31/01/2013 17:50:36

Kreu i PSV91 i përgjigjet pyetjeve të lexuesve të Hermesnews.org

Zgjedhjet, koalicionet, vota e qytetarëve jashtë dhe mesazhi për kreun demokrat Berisha. Opozitari i përgjigjet pyetjeve të lexuesve në Facebook

TIRANE - Këto ditë funksionarë të PSV91 dalën kundër uljes suaj në tryezën opozitare me Edi Ramën, duke pohuar se organet e partisë nuk kanë marrë një vendim për koalicion me PS-në. Cili është mendimi juaj për këto zëra që vijnë nga brenda PSV91, ka përçarje brenda partisë suaj ?

Petro Koçi: Nuk ka ndonjë funksionar të PSV91 që të ketë dalë kundër koalicionit me PS-në. Koalicioni ynë nuk është një lajm i ri për publikun e as për partinë. Që para zgjedhjeve të 2009 deklaruam në konferencën kombëtare bashkëqeverisjen me PS. Pavarësisht se në ato zgjedhje ishim në koalicion zgjedhor me LSI. Në zgjedhjet lokale u bashkuam ne koalicionin me PS dhe pesë fishuam rezultatin.

Nëse hyni në koalicion me Edi Ramën dhe PS + koalicioni i së majtës fiton zgjedhjet, të cilët do të jenë pozicionet tuaja në kabinetin qeverisës ?

Ne nuk hymë në koalicion për të bërë pazare me qeverisjen. E rëndësishme është të arrihet rotacioni politik. Pa rotacion nuk ka ndryshim. Qeverisja i merr kontributet sipas meritës dhe peshës elektorale. E kam fjalën te ndarja e pushtetit politik. Për ne mbetet sfidë e madhe përfaqësimi parlamentar. Sistemi përjashtues në fuqi pengon realizimin e këtij objektivi kështu që do të duhet që formula e bashkëpunimit me PS-në të bëjë të mundur neutralizimin e efektit përjashtues të Kodit.

Ju synoni të vini në pushtet së bashku me të majtën. Pyetja që rëndom shtrohet është kjo: pushtetin e shikoni si diçka që duhet marrë me çdo kusht, apo vini për t'i sjellë vendit zhvillimin e munguar ? Nëse është kjo e dyta, ka një program real qeverisës e majta shqiptare dhe cili është ai ?

Rotacioni është një domosdoshmëri historike. Shteti është kapur nga klanet private të maxhorancës. Kemi një varfërim të demokracisë dhe rrënim të drejtësisë. Korrupsioni ka marrë pushtetin në çdo zyrë dhe shërbim shtetëror. Pa mbërritur te diskutimet për programet duhet të pranojmë se shmangia e dhunshme e rotacionit do ta destabilizonte në përmasa të rrezikshme situatën politike në Shqipëri. Nga ana tjetër opozita ka punuar për përpunimin e programit të ri qeverisës. Eshtë hequr dorë nga disa koncepte të oaqarta as majtas as djathtas duke adaptuar koncepte më sociale dhe me të drejta qeverisëse. Vendi ka nevojë për drejtësi financiare. Duhet zbutur dukshëm hendeku mes shumicës dhe një grushti të pasurish në përbërje të oligarkisë financiare në vend. Mendoj se PSV do kontribuojë në ndërgjegjen shtetërore të qeverisjes.

Pyetja ime e fundit për Koçi: Jam i interesuar të marr një përgjigje të drejtpërdrejt dhe jo duke i rënë qoshkave. ftesa e Edi Ramës për LSI-në dhe FRD-në ju duket e moralshme?

Kam folur dhe herë tjetër për këtë. Darka informale Rama Meta la një shije të hidhur. Mendoj se ndërkohë ftesa ndaj faktorëve politik jashtë koalicionit të mos degjenerojë në lutje. Mjafton fakti që PS ndryshe nga 2009 është e hapur për një koalicion sa më të gjerë. Kjo u duk dhe në zgjedhjet e fundit vendore. LSI-në nuk e merr për dore Rama, por Meta. Topi ka kohë që është në fushën e LSI përsa i përket bashkëpunimit me të majtën. Cdo ditë që kalon e bën mundësinë e kthimit të pamundur dhe të pajustifikuar moralisht. Ndryshe qëndron puna me FRD. Ajo është parti në opozitë. Opozitat mund të bashkohen për sfida kombëtare.

Sa i besushëm është Rama për ju dhe nëse është, pse nuk e shkrini partinë e tuaj me PS-në e vërtetë ?

Rama dhe ne jemi për të njëjtën kauzë politike tashmë. Pranimi i gabimit mbi Kushtetutën, ndryshimi i qëndrimit ndaj bashkëpunimit elektoral, kalimi i progrmit të partisë majtas kanë qenë thelbësore në afrimin tonë me Ramën. E kam thënë dhe herë tjetër: Kur qeveria na vret katër shokë në mes të bulevardit unë nuk kam sy e faqe të kritikoj Ramën apo shokë të tjerë socialiste. Sepse situata ka mbërritur në rrethana kritike. Të merresh me diferencat mes nesh do ishte një luks idiotesk. Shkrirja e partisë nuk është hap logjik në rastin e këtij kodi që kërkon sa më shumë faktorë elektorale në fushë për të fituar zgjedhjet. Pas 23 Qershprit kjo mund të ndodhë.

Me kë do të jeni në koalicion ?

Ne nuk kemi dalë nga koalicioni si në zgjedhjet vendore. Per ne nuk ka alternativë tjetër veç këtij ku jemi integruar.

A mendoni se e majta, ka resurset, stafin dhe dëshirën për të bërë të mundur votën e qytetarëve që jetojnë jashtë, nëse vjen në pushtet ?

Kjo çështje ka lidhje me sistemin. Një dimension i proporcionalit kombëtar do ta zgjidhte këtë në favor të votës pa ndërlikime për emigrantët. Dhe gjykoj se nëse politika nuk varet elektoralisht nga emigrantët ajo ska për të bërë dot atë që meritohet. Pa rritur pushtetin e qytetarit mbi qeverisjen, kjo e fundit do të mbetej në shërbim të një grushti njerëzish. Prandaj unë mbetem në luftë të hapur kundër kuadrit aktual kushtetues dhe Kodit zgjedhor. E majta e ka arsenalin politik të bollshëm për ta realizuar aspiratën votuese të emigrantëve.

Nëse tani do kishit Berishën përballë, çfarë do t'i thonit ?

Largohu !


* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi

Përgatiti për botim Doriana Metollari

Dërgo me email | Stampo artikullin