31/01/2013 11:23:25

Balfin, riblen zinxhirin Euromax

Autoriteti i Konkurrencës bën të ditur lajmin për blerjen e fundit të Balfin me pronar sipërmarrësin Samir Mane

TIRANË - Grupi "Balfin" Sh.p.k ka riblerë rrjetin e supermarketeve "Euromax" nga "Delihaze Albania", filial shqiptar i grupi belg "Delihaze". Autoriteti i Konkurrencës bën të ditur lajmin për blerjen e fundit të "Balfin" me pronar sipërmarrësin Samir Mane, që njihet si zhvilluesi i zinxhirit të madh të supermarketeve në vend, "Euromax". Rreth 5 vjet më parë "Balfin" ja shiti këtë rrjet grupit serb "Delta Maxi", që në 2011 e shiti tek grupi belg, "Delihaize".

Transaksioni sipas Autoritetit të Konkurrencës, është kryer në 20 dhjetor 2012 në bazë të "Memorandumit të mirëkuptimit" mes palëve "Balfin Sh.p.k" si blerës dhe "Delihaze Group S.A" si shitës nëpërmjet transferimit të 100% të kuotave.

Sipas Autoritetit të Konkurrencës, "Delihaize Albania" Sh.p.k: ushtron veprimtarinë në fushën e tregtimit me pakicë të produkteve ushqimore me anë të rrjetit të saj prej 18 dyqaneve Euromax në të gjithë Shqipërinë. Ky filial është pjesë e grupit "Delihaze" Group S.A, shitës ndërkombëtar me pakicë i produkteve ushqimore në 6 vende dhe tre kontinente.

"Balfin" Sh.p.k ushtron veprimtarinë në fushën e import-eksportit, shitjes me shumicë dhe pakicë të mallrave industrial dhe ushqimorë, tregtimi i mallrave të ndryshëm, transport të mallrave, etj.

Hipermarketi i parë i "Euromax" u hap në 2005 në QTU, si një markë lokale e grupit "Balfin" dhe ishte një risi për tregun shqiptar. Në vitin 2008, grupi serb i pakicës, "Delta Maxi Group" bleu 100% të aksioneve për 29 milion euro.

Për shkak të problemeve organizative dhe marrëdhënieve me furnitorët, Euromax përjetoi një ngadalësim të aktivitetit, pas vitit 2008. Por në mars 2011, "Delihaize" tregtuesi belg i pakicës, bleu grupin "Delta Maxi" duke hyrë dhe në tregun shqiptar me "Euromax", zinxhiri më i madh i supermarketeve e hipermarketeve në vend.

"Balfin Group" është një nga shoqëritë private investuese më të mëdha, me aktivitet brenda dhe jashtë Shqipërisë, e zotëruar plotësisht nga Samir Mane.

Me aktivitet në disa sektorë, "Balfin Group" konsiderohet investitori me portofolin më të diversifikuar në Shqipëri në sektorët e ndërtimit, tregtisë me pakicë dhe shumicë në fushën e elektronikës dhe modës, menaxhimin e qendrave tregtare, shërbime, mikrokredi, telekomunikacion.

Në 2011, "Balfin Group" promovoi hapjen e qendrës tregtare më të madhe në rajon "Tirana East Gate" dhe po zhvillon investime në ndërtim në zona rezidenciale në Tiranë si "Rolling Hills", Ambasador 2, Ambasador 3 dhe Yzberisht.

Në 2012, "Balfin Group" inauguroi investimin më të madh të vitit, qendrën tregtare "Scopje Mall" në Shkup (Maqedoni) dhe nisi punimet për ndërtimin e qendrës më të madhe logjistike në rajon, "Tirana Logistic Park".

HermesNews - ©2013

Dërgo me email | Stampo artikullin