30/01/2013 15:48:40

Vlore, kapet peshkaqeni 4 metra e gjate

Kapiteni i peshkarexhës tha se, peshkaqeni u kap në afërsi të ishullit të Sazanit, në një thellësi prej të paktën 140 metra

VLORE - Një peshkaqen me gjatësi rreth 4 metra dhe peshë të paktën 3.5 kv, ra në rrjetat e një peshkarexhe në gjirin detar të Vlorës. Kapiteni i peshkarexhës "Pavarësia", Sali Saliaj, tha se, peshkaqeni u kap në afërsi të ishullit të Sazanit, në një thellësi prej të paktën 140 metra. Sipas tij, specia e rrallë për ujrat detarë të Vlorës, kishte përmasa të pazakonta dhe ajo ra në rrjetat e peshkimit, duke rrezikuar t’i dëmtonte ato.

Prania e peshkaqenëve në ujrat detare të gjirit të Vlorës është shpeshtuar gjatë viteve të fundit. Në datën 17 mars të vitit 2009, ekipazhi i një anijeje peshkimi kapi një peshkaqen në hapësirën detare mes ishullit të Sazanit dhe gadishullit të Karaburunit, rreth 15 milje në perëndim të bregdetit të Vlorës. Peshkaqeni me gjatësi 4 metra dhe peshë rreth 300 kg me ngjyrë gri në të errët, u kap në jug të ishullit të Sazanit, në një thellësi prej disa dhjetra metrash.

Ai kishte mbetur në rrjetat e hedhura në det nga ekipazhi i peshkarexhës "De Rada" dhe u nxorr në kuvertën e anijes i gjallë, ndërkohë që gjatë kësaj kohe, ai kishte dëmtuar një pjesë të madhe të peshqve që ndodheshin në rrjetë.

Më herët, në 7 janar të atij viti, rrjetat e një tjetër peshkarexhe nxorrën nga thellësia e detit një peshkaqen të llojit "Pëllumb", me gjatësi 4 metra dhe peshë 370 kg. Nga ana tjetër, vetëm gjatë vitit 2008, në këtë zonë u kapën 3 "banorë" të tillë të ujit, më i madhi me një peshë 500 kg. Specialistët mendojnë se prania e peshkaqenëve në ujrat detarë të Vlorës, lidhet me ndryshimin (rritjen) e parametrave termikë të hapësirës ujore.

Krahas kësaj, në ujrat detare të Vlorës është regjistruar edhe prania e delfinëve. Ngjarja më e freskët u shënua në 24 qershor të vitit 2012, kur, dy delfinë të përmasave të konsiderueshme u shfaqën në afërsi të Rradhimës, në një distancë prej 150-200 metra nga bregu. Megjithatë edhe prania e delfinëve nuk është ngjarje pa precedent në ujrat detare të bregdetit shqiptar të jugut. Në muajin maj të vitit 2002, në bregdetin e Himarës, në zonën e emërtuar Plazhi i Llamanit, deti nxori një tjetër specie të tillë, një delfin të vogël, i cili kishte ngordhur pas përplasjes me një mjet lundrues.

HermesNews - ©2013

Dërgo me email | Stampo artikullin