30/01/2013 10:13:18

Mungesa e komunikimit mes autoriteteve bllokon qytetarët në Athinë

Toponimet shqip nëpër pasaporta, krijojnë vakuum në burokracitë greke

TIRANË - Sërish pengesa në kufirin grek si pasojë e emërtimeve në gjuhën shqip të toponimeve në pasaporta.

Nëse më parë ndalimet janë bërë në kufijtë tokësorë, këtë radhë shtetasit shqiptarë, kryesisht fëmijë të lindur në Greqi, si rrjedhojë e emigrimit të prindërve të tyre, janë ndaluar në aeroportin e Athinës.

Siç bëhet e ditur nga mediat greke, sot në mëngjes janë bllokuar 14 persona, të cilëve nuk u lejohet kalimi drejt destinacionit ku janë drejtuar.

I kthyer tashmë në fenomen, ngjarja e sotme përsëritet për të tretën herë brënda një periudhe të shkurtër kohore. Fillimisht pretendimet e autoriteteve kufitare greke u shfaqën në muajin dhjetor të vitit të kaluar, por, si rezultat i një komunikimi mes palësh nga ana e dy ministrive të Jashtme, Shqipërisë dhe Greqisë, u duk sikur iu dha zgjidhje problemit.

Por sërisht ditët e para të këtij viti, shtetasit shqiptarë u ndaluan me po të njëjtin pretendim, ku sërish u desh ndërhyrja e ministrit tonë të Jashtëm, Edmond Panariti, për të zgjidhur këtë ngërç, zgjidhje kjo që siç duket ka rezultuar afatshkurtër. Nuk ka ende asnje reagim zyrtar nga ana e autoriteve shqiptare apo greke lidhur me këtë problem.

HermesNews - ©2013

Dërgo me email | Stampo artikullin