28/01/2013 13:01:07

Transporti që pati rritje, ai ajror

Sipas INSTAT-it, në 3-mujorin e tretë 2012 rezulton se me linja ajrore udhëtuan 529.088 pasagjerë, prej të cilëve, 269.752 ikën jashtë vendit dhe 259.336 pasagjerë hynë në Shqipëri përmes Rinasit

TIRANE - Shqiptarët po rrisin udhëtimet me avion jashtë vendit, bashkë me transportimin e mallrave, krahasuar me transportet e tjera.

Sipas INSTAT-it, në 3-mujorin e tretë 2012 rezulton se me linja ajrore udhëtuan 529.088 pasagjerë, prej të cilëve, 269.752 ikën jashtë vendit dhe 259.336 pasagjerë hynë në Shqipëri përmes Rinasit.

Pjesa kryesore e udhëtimeve u përket shoqërive të përbashkëta të avioneve, me 282.904 udhëtarë dhe 246.184 të tjerë me linjat e shoqërive të huaja. Në transportin ajror shqiptar operojnë sot 14 shoqëri fluturimi, një vetëm si shoqëri e përbashkët dhe 13 të tjera të huaja.

Në 3-mujorin e tretë 2012 u kryen gjithsej 5.990 fluturime, nga të cilat 3.458 të kryera nga shoqeria e përbashkët dhe 2.532 fluturime nga shoqeri të huaja, sipas INSTAT-it.

Gjithashtu, në këtë periudhë përmes transportit ajror të mallrave tendenca shënoi rritje për mallrat që hynë në Shqipëri dhe më pak në dalje. Sipas INSTAT-it, në 3-mujorin e tretë 2012 hynë në Rinas rreth 367 ton mallra nga një total prej 444 ton dhe dolën jashtë kufirit shqiptar 77 ton mallra.

Për mallrat e transportuara nga sherbimet postare vihet re se nga 84 ton mallra postare që qarkulluan me transport ajror, 68 ton rezultuan se hynë në Rinas dhe 16 ton mallra dolën përmes shërbimeve postare.

HermesNews - ©2013

Dërgo me email | Stampo artikullin