28/01/2013 12:56:21

KQZ, nuk pranohet kerkesa e PS-se

Një kërkesë e tillë nuk është pranuar nga kryetarja e KQZ-zë, Lefteri Lleshi, e cila u shpreh se kjo pikë nuk ishte përfshirë ne rendin e ditës dhe do të diskutohet në mbledhjet e radhës së komisionit

TIRANË - Ka filluar me debate mes kryetares dhe nënkryetarit mbledhja e sotme e Komisionit Qendror të Zgjedhjeve. Siç kishin paralajmëruar përfaqësuesit e Partisë Socialiste në këtë institucion, sot duhej të merrej në shqyrtim kthimi i formulës së ndarjeve së mandateve, në një kohë që çështja ka kaluar nga komisioni i Ligjeve në Kuvend për miratim.

Një kërkesë e tillë nuk është pranuar nga kryetarja e KQZ-zë, Lefteri Lleshi, e cila u shpreh se kjo pikë nuk ishte përfshirë ne rendin e ditës dhe do të diskutohet në mbledhjet e radhës së komisionit.

Ndërsa nënkryetari Biba e ka konsideruar këtë vendim si shkelje të drejtpërdrejtë të ligjit, pasi sipas tij, nëse dy ose më shumë anëtarë të këtij komisioni, kërkojnë shqyrtimin e një çështjeje, KQZ-ja duhet ta përfshijë atë në rend dite.

Një tjetër shqetësim i ngritur në mbledhjen e sotme nga ana e kreut të sekretariatit zgjedhor të PS-së në KQZ-zë, Genc Gjoncaj, kishte të bënte me lëvizjet demografike, sipas tij, të qëllimshme, të bëra në prag zgjedhjesh.

Gjoncaj iu drejtua komisionit me kërkesën për të hetuar mbi lëvizjet e qytetarëve drejt zonave verilindore, pikërisht në periudha parazgjedhore, pasi siç u shpreh ai, 'Partia Socialiste ka mbledhur informacion të mjaftueshëm që vërteton këtë dyshim".

HermesNews - ©2013

Dërgo me email | Stampo artikullin