25/01/2013 06:07:51

LRI orienton studentët drejt praktikave të punës

Bashkëpunimi me universitetet është i rëndësishëm për te realizuar praktikat e punës

TIRANË - Lëvizja Rinore për Integrim, organizoi sot një tryezë të rrumbullakët për praktikat e punës së studentëve. Sipas kreut të LSI-së, Ilir Meta, “arsimimi për punësim duhet të jetë një devizë e të gjithëve sepse gjithçka duhet të jetë në funksion të tregut të punës dhe formimi profesional duhet t’i shërbejë një pune të sigurtë në të ardhmen, përmes aftësive profesionale”.

Meta u shpreh se, “nevojitet një partneritet mes qeverisë, universiteteve dhe biznesi. Sepse vetë Universitetet duhet të jenë shumë të interesuar për të realizuar në mënyrë efektive praktikat e punës. Biznesi ka një rol mjaft të rëndësishëm, pasi 80% e ekonomisë është në sipërmarrje private. Kjo mund të realizohet përmes marrëveshjeve me dhomat e tregtisë”.

Meta shtoi se duhet punuar me legjislacionin. “Pra kjo të mos mbetet thjesht në vullnetin e mirë të një formuri rinor të një partie politike”. Gjithashtu shtoi kreu i LSI-së, kjo inisiativë duhet të avancojë përmes shembullit konkret. “E rëndësishme është që kjo praktikë pune të njihet, të realizohet”.

Një sfidë tjetër, shtoi Meta, “ka të bëjë me formimin profesional në përgjithësi, që është proces që asnjëherë nuk përfundon, sepse jetojmë në një kohë të re të formimeve teknologjike dhe gjithmonë ka nevojë të re për përditësim me zhvillimet e kohës”.

Ndërsa ministri i Ekonomisë, Tregtisë dhe Energjitikës, Edmond Haxhinasto u shpreh se, “intershipi ose praktika e punës në fund të fundit ka si qëllim aftësimin për punë që sjell cilësi, ku këta të rinj do të angazhohen për punë pas formimit profesional.

HermesNews - ©2013

Dërgo me email | Stampo artikullin