23/01/2013 18:13:38

Njeriut që na mësoi humorin, faleminderit Paulin !

nga Doriana Metollari

Hermesnews - Do t'i mungojë të gjithëve Paulin Selimi dhe mbi të gjitha do të kujtohet sa herë që do të flitet për figurat më të spikatura të humorit. Askush, që ka parë të paktën një herë të vetme "Kunatin e shokut Xhemal", nuk do ta harrojë dot as Paulin Selimin, por jo vetëm për atë.

Pena e tij e shkathët dhe plot jetë që nxirrte një humor të rafinuar, u bënë pjesë të identitetit artistik të tij në vite, por kush e njohu do t'a kujtojë dhe për batutat plot humor në të përditshmen, mënyrën sesi ai e shihte botën, njerëzit, stilin unik në art, por dhe për shpirtin e mirë.

Paulin Selimin do ta kujtojmë për dritat e humorit që gjallëronte tavolinat e festave, nxënësit për dijet dhe kulturën e gjerë që u transmetoi, familja për pasurinë e madhe shpirtërore që u la, njerëzit për buzëqeshjen dhe të gjithë ne për stilin e tij unik në art.

Paulin Selimi do të na mungojë dhe për modestinë e vet, dijet dhe karizmën. Do të jetë përherë në kujtesën e artistëve, në faqet e historisë së institucioneve të artit, pasi dashuria e tij për skenën rriti vlerat e tyre.

Shkodra, humbi një artist, që me artin e tij identifikoi një qytet. Një artist që diti t'ia përshtasë dialektin e pastër shkodran sa e sa veprave që do të interpretohen nga brezat. Faleminderit "babait" të humorit, faleminderit Paulin...! mbi të gjitha faleminderit që ishe për ne, sidomos atëherë kur ne harruam t'i qeshnim jetës...

HermesNews - ©2013

Dërgo me email | Stampo artikullin