22/01/2013 10:22:05

Izrael, hapen qëndrat e votimit

Qendrat e votimeve do të mbyllen rreth orës 20:00 GMT, nën masa të rrepta sigurie

JERUSALEM - Qendrat e votimeve u hapën sot zyrtarisht në Izrael për zgjedhjet legjislative, për të cilat kryeministri i djathtë, Benjamin Netanyahu është favorit.

Qendrat e votimeve do të mbyllen rreth orës 20:00 GMT, nën masa të rrepta sigurie. Mediat vendase pritet të publikojnë rezultatet pas përfundimit të zgjedhjeve. Rreth 5,6 milionë izraelitë votojnë për të rinovuar 120 deputetët dhe me sa duket Netanyahu është favorit.

Sipas sondazheve të fundit të publikuara ditën e premte, partia "Likud" e kryesuar nga kryeministri Netanjahu dhe ajo "Izrael Beiteinu" e ultranacionalistit, Avigdor Lieberman kanë marë 32 nga 35 vende në Knesset.

Sipas sondazheve, partia e Punës (16 ose 17 vende), Yesh Atid (10 ose 13), dhe HaTnouha, lëvizja e kryesuar nga ish-ministri i Jashtëm, Tzipi Livni (7 ose 8). Si udhëheqës i fortë, "Bibi" Netanjahu është favorit për të marrë një mandat të tretë.

Netanjahu votoi sot herët në mëngjes i shoqëruar nga bashkëshortja e tij, Sara në qendrën e votimit në Rehavia, lagjia luksoze në perëndim të Jerusalemit, ku ndodhet rezidenca e tij zyrtare. "Nuk pres shumë ndryshime, por shpresoj një zgjidhje", deklaroi një votues, Joe Djemal, 55 vjeç, në një qendër votimi në Jerusalem.

Promotor aktiv i kolonizimit, Netanyahu ndodhet nën presionin e komunitetit ndërkombëtar në veçanti të evropianëve për të filluar bisedimet e pezulluara që nga shtatori i vitit 2010 me presidentin palestinez, Mahmoud Abbas.

Deri tani Netanyahu nuk ka arritur që të bindë aleatët e tij, kryesisht SHBA-në për fillimin e një operacioni ushtarak të domosdoshëm kundër zonave bërthamore të Iranit.

Marrëdhëniet e tij të tendosura me presidentin amerikan të rizgjedhur, Barack Obama përbëjnë për Izraelin një rrezik izolimi diplomatik në rritje.

HermesNews - ©2013

Dërgo me email | Stampo artikullin