21/01/2013 19:13:33

Nobelisti Muhamad Yunus ne Shkoder

Takim me artizanet e qytetit

SHKODËR - Artizanet e njohura shkodrane të fshatit Zogaj, në breg të Liqenit të Shkodrës, kanë patur sot një mysafir të veçantë, profesor Muhamad Yunus, promotor i biznesit social në botë, fitues i çmimit Nobel për Paqen në vitin 2006.

Në këtë vizitë në fshatin turistik Zogaj, që shquhet për mjeshtërinë artizanale të prodhimit të qilimave, Muhamad Yunus, shoqërohej nga përfaqësues të Ministrisë së Punës dhe të zyrës Yunus Social Business Albania.

Gjatë vizitës së tij, prof. Yunus u njoh nga afër me mënyrën e të punuarit në punishten shumë të njohur, jo vetem në Shkodër, por edhe në shkallë vendi, në të cilen janë të punësuara vajzat dhe gratë zaganjore të bregut të liqenit.

Gjatë prononcimit për mediat e pranishme, Prof. Yunus u ndal tek biznesi social, duke theksuar ai ka mundësi kudo për t'u zhvilluar. Yunus tha se "prodhuesit e vërtetë në shumicën e vendeve, shfrytëzohen, ato punojnë shumë, kanë aftësi tradicionale, por marrin shumë pak para".

Sipas tij, "këto biznese përqëndrohen në zgjidhjen e problemeve të njerëzve, kështu që prodhuesit e vërtetë duhet të marrin çmimin më të mirë". "Ky është një problem global, nuk është vetem i Shqipërisë, por ne mendojmë që shembulli i Shqipërisë të bëhet edhe një model për vendet e tjera", nënvizoi Yunus.

I pyetur për çmimin e marrë prej tij, Prof. Muhamad Yunus sqaroi se çmimi është dhënë për punën me gratë për dhënien e kredive të vogla në favor të grave. Dhe kjo ide, vijoi ai, është bërë tashmë popullore në të gjithë botën, dhe përmes këtij mekanizmi gratë mund të bëjnë biznesin dhe aktivitetet e tyre të qëndrueshme.

Duke folur diçka për aktivitetin e tij personal, ai bëri të ditur se është profesor i ekonomisë, duke ushtruar aktivitetin e tij në SHBA dhe në Universitetin e Chittangong në Bangladesh, ndërkohë që spikat në ngritjen dhe zhvillimin e një prej bankave më të mëdha të mikrokredisë dhe mikrofinancës për të varfërit të cilët nuk kanë akses në banka për shkak të gjendjes së tyre ekonomike sociale.

HermesNews - ©2013

Dërgo me email | Stampo artikullin