21/01/2013 18:49:17

Rusi, shitje rekord armesh

Shifra përfaqëson një rritje ekonomike prej 15 për qind në krahasim me vitin 2011, kur Moska kishte dërguar armë me një vlerë prej 13,2 miliardë dollarësh

MOSKË - Eksportet e pajisjeve ushtarake nga Rusia, furnizuesi i dytë i armëve në botë, arritën një nivel rekord prej 15,2 miliardë dollarësh në vitin 2012, bënë të ditur sot burime zyrtare vendase. "Kjo shifër kalon 12 për qind të objektivave të qeverisë", deklaroi Aleksander Fomin, drejtor i Shërbimeve Federale të Bashkëpunimit Tekniko-Ushtarak.

Shifra përfaqëson një rritje ekonomike prej 15 për qind në krahasim me vitin 2011, kur Moska kishte dërguar armë me një vlerë prej 13,2 miliardë dollarësh. Rusia, furnizuesi i dytë i armëve në botë pas Shteteve të Bashkuara të Amerikës, ka më tepër se dyfishi i shitjeve jashtë vendit në krahasim me fillimin e viteve 2000.

Vendi numëron ndër klientët e tij më të mëdhenj Indinë dhe Kinën. Rusia vazhdon t'i shesë pajisje Sirisë, por mendohet se bëhet fjalë kryesisht për sisteme mbrojtëse antiajrore. Fomin theksoi se Afganistani, Gana, Tanzania dhe Omani figuronin ndër klientët e rinj të industrisë ruse në vitin 2012.

Në dhjetor, presidenti rus, Vladimir Putin përshëndeti rekordin e ri të eksporteve ushtarake dhe shtoi se kontratat e reja të nënshkruara në vitin 2012 për dërgesa të tjera të mundshme përbënin gjithashtu 15 miliardë dollarë.

Në fund të dhjetorit, ai përfitoi nga udhëtimi zyrtar në Indi, importuesi i parë botëror për të nënshkruar marrëveshje me vlerë miliarda dollarë, kryesisht për helikopterët dhe avionët luftarakë.

HermesNews - ©2013

Dërgo me email | Stampo artikullin