21/01/2013 16:11:03

ERE heq licencen CEZ

ERE po ashtu i kërkoi Këshillit të Ministrave të procedojë për shpronësimin e aseteve të kompanisë çeke ÇEZ

TIRANE - Enti Rregullator i Energjisë (ERE) vendosi unanimisht për heqjen e licencës për furnizmin me energji elektrike dhe shpërndarjen e saj për konsumatorin, kompanisë çeke ÇEZ Shpërndarje.

ERE po ashtu i kërkoi Këshillit të Ministrave të procedojë për shpronësimin e aseteve të kompanisë çeke ÇEZ. Bordi i ERE-s njëkohësisht miratoi me 4 vota pro dhe 1 kundër edhe Sahit Dollapin si administrator të Operatorit të Shpërndarjes së energjisë elektrike.

Kompania çeke ÇEZ kishte 76 % të aksioneve ndërsa 24 % i kishte qeveria shqiptare. ÇEZ u largua pasi nuk përmbushi kushtet e kontratës për importin e furnizmin me energji të konsumatorëve si dhe uljen e humbjeve.

Më herët në nisje të mbledhje së bordit, Kryetari i Entit, Sokol Ramadani, bëri të ditur se për shkak të mos kryerjes së funksionit bazë të kompanisë ÇEZ që ka të bëjë me importin e energjisë elektrike për furnizmin e qytetarëve, do të shqyrtohet heqja e licencës operatorit të shpërndarjes.

"Në shtator, ÇEZ shtyu importin e energjisë, që në fakt ishte detyre e kësaj kompanie," tha Ramadani. Sipas tij, megjithëse u bënë përpjekje me Sekretariatin e Energjisë për gjetjen e një zgjidhjeje, ÇEZ nuk kishte ndër mend që të kryente funksionet e tij. "ÇEZ madje na bëri të ditur në shkresa se mund të mos furnizonte qytetarët me energji", tha Ramadani.

Drejtore e Licencave në ERE, Erjola Sadushi, prezantoi edhe raportin e përgatitur nga ERE për aktivitetin e ÇEZ. Sipas këtij raporti, ekzistojnë akte ligjore në fuqi për rregullimin e tregut të energjisë, ku një prej më të rëndësishmëve është ai për furnizimin pa ndërprerje me energji.

Sipas Sadushit, me këtë privatizim shteti kishte si qëllim gjetjen e një investitori strategjik, që të menaxhonte në mënyrë eficiente sistemin, ndërkohë që pas privatizimit u miratua dhe deklarata rregullatore. Në bazë të kësaj të fundit ÇEZ duhet të ulte humbjet, duhet të bëhej një studim për borxhet e këqija për vitet 2008, 2009 dhe 2010 si dhe kompania duhet të paraqiste planin e investimeve.

Drejtori Juridik në ERE, Eduart Elezit tha se Enti ka të drejtë që të heqë licencën, kur ÇEZ nuk respekton kontratën, duke përmendur se importi i energjisë për të mbuluar humbjet ishte kusht i kontratës.

Kjo mbledhje vjen në zbatim të nenit 7 të Ligjit Nr.9072, datë 22.05.2003, "Për Sektorin e Energjisë Elektrike"; Rregullores për Organizimin dhe Funksionimin e Brendshëm të ERE-s dhe Rregullave të praktikës dhe proçedurave të ERE-s.

Kompania çeke ÇEZ e filloi administrimin zyrtarisht të shpërndarjen e energjisë elektrike në Shqipëri më 30 mars 2009.

HermesNews - ©2013

Dërgo me email | Stampo artikullin