21/01/2013 10:11:46

Barack Obama betohet si President në mandatin e dytë

'Unë, Barack Hussein Obama, betohem solemnisht se do të përmbush me besnikëri funksionet e presidentit të SHBA-së dhe do të bëj çdo gjë të mundshme në aftësitë e mia, të respektoj, të ruaj dhe të mbroj Kushtetutën e SHBA-së'

(18:00) - Barack Obama bëri sot betimin për një mandat të dytë katërvjeçar në krye të SHBA-së, përballë një turme prej qindra mijëra personash të mbledhur në qendër të Uashingtonit.

"Unë, Barack Hussein Obama, betohem solemnisht se do të përmbush me besnikëri funksionet e presidentit të SHBA-së dhe do të bëj çdo gjë të mundshme në aftësitë e mia, të respektoj, të ruaj dhe të mbroj Kushtetutën e SHBA-së'', përsëriti Obama përballë presidentit të Gjykatës së Lartë amerikane.


WASHINGTON - Qindra mijëra persona priten sot në qendër të Washingtonit për ceremoninë madhështore të betimit të presidentit Barack Obama, i cili filloi një ditë më parë mandatin e tij të dytë në krye të Shtëpisë së Bardhë.

Ceremonia madhështore e betimit në Kapitol, do të përmbajë fjalimin me përmbajtje historike, parada dhe vallëzime në praninë e personaliteve të famshme, ndërsa kryeqyteti i rrethuar nën masat e rrepta të sigurisë do të festojë gjatë gjithë ditës këtë moment të demokracisë amerikane.

Pika kulmore do të jetë rreth orës 17:00 GMT, kur Obama do të ngjitet në tribunën e kupolës së madhe të Kapitolit, ku do të bëjë betimin presidencial.
"Unë, Barack Hussein Obama, betohem se do të përmbush me besnikëri detyrat e mia si president i Shteteve të Bashkuara të Amerikës dhe do të ruaj dhe do të mbroj në çdo mënyrë Kushtetutën e SHBA-së", pritet të shprehet ai.

Ceremonia fillestare private u zhvillua një ditë më parë në Shtëpinë e Bardhë, më 20 janar, në mesditë, data dhe ora e përcaktuar në Kushtetutë për fillimin e mandatit presidencial.

Pas betimit, Obama pritet të mbajë fjalimin historik sikurse disa prej paraardhësve të tij, si John F. Kennedy i cili kishte deklaruar, "Mos kërkoni të dini se çfarë mund të bëjë vendi juaj për ju, por çfarë mund të bëni ju për vendin tuaj".

Obama dhe bashkëshortja e tij, Michelle, pas një dreke në Kapitol, do të kryesojnë një parade në "Pennsylvania Avenue", arterie rrugore që lidh selinë e Kongresit me Shtëpinë e Bardhë.

Dita që filloi me një meshë do të përfundojë me mbrëmje vallëzimi që familja Obama do të nderojë me praninë e tyre, në Pallatin e Kongreseve.
Katy Perry, Stevie Wonder, aktorë dhe këngëtarë me famë, të cilët kanë fituar çmime "Oscar" si Jamie Foxx dhe Jennifer Hudson do të ngjiten në skenë për të përnshëndetur çiftin presidencial.

HermesNews - ©2013

Dërgo me email | Stampo artikullin