21/01/2013 10:03:48

ERE, në diskutim heqja e Liçencës për kompaninë CEZ

Pritet të emërojë administratorin e ri të kompanisë së shpërndarjes së energjisë elektrike

TIRANE - Bordi i Komisionerëve të Entit Rregullator të Energjisë (ERE) do të zhvillojë sot mbledhjen e tij, në të cilën do të diskutohet mbi procesin e heqjes se liçensave së shpërndarjes dhe furnizimit publik me pakicë të energjisë elektrike shoqerisë CEZ Shpërndarje.

Kjo mbledhje vjen në zbatim të nenit 7 të Ligjit Nr.9072, datë 22.05.2003, Për Sektorin e Energjisë Elektrike; Rregullores për Organizimin dhe Funksionimin e Brendshëm të ERE-s dhe Rregullave të praktikës dhe proçedurave të ERE-s.

Sot, bashkë me vendimin për heqjen e licencave të CEZ Shpërndarje, Bordi pritet të emërojë administratorin e ri të kompanisë së shpërndarjes së energjisë elektrike.

Në 18 janar Bordi i ERE zhvilloi seancën dëgjimore me kandidatët që kanë aplikuar për pozicionin e administratorit të kompanisë së Shpërndarjes së Energjisë.

Mes 6 kandidaturave për këtë post, një pjesë kanë qënë në pozicione drejtuese në KESH, si ish-kreu i OSSH deri në privatizim, sot drejtor i Ujësjellës - Tirana, Sait Dollapi, ish-nëndrejtori i KESH-it Genc Gjergjani dhe Agron Sesesi si dhe Rezart Isufi, Artan Topi, Onorina Jata.

Një javë më parë ERE miratoi rregulloren për përzgjedhjen e administratorit dhe funksionimit në kompaninë e shpërndarjes së energjisë pasi t'i hiqen licencat CEZ-it.

HermesNews - ©2013

Dërgo me email | Stampo artikullin