21/01/2013 09:49:11

Operacionet e ushtrise: tjetër masakër pengjesh në Algjeri

E përditshmja frankofone, El Watan, citonte dje burime të sigurisë duke përmendur zbulimin e rreth 30 trupa të pajetë të pengjeve të huaja, vendas dhe ushtarë të ushtrisë algjeriane

MANILA - Të paktën gjashtë filipinas humbën jetën dhe katër të tjerë u raportuan të zhdukur pas pengmarrjes katër ditë më parë në një kompleks gazi në Algjeri, bënë të ditur sot burime zyrtare vendase. "Vdekja e gjashtë filipinasve është një pasojë e drejtpërdrejtë e pengmarrjes. Disa humbën jetën nga shkëmbimet e zjarrit apo nga plagët e marra gjatë shpërthimeve", deklaroi për mediat Raul Hernandez, zëdhënës i Ministrisë së Jashtme.

"Katër rezultojnë të zhdukur. U konfirmua se 16 filipinas, të cilët ishin në vendngjarje janë shëndoshë e mirë", theksoi ai. Asnjë bilanc zyrtar nuk është konfirmuar që nga njoftimi i rrjetit televiziv algjerian Ennahar mbi zbulimin e një dite më parë nga forcat algjeriane të 25 trupave të pajetë të pengjeve në kompleksin e gazit, pranë In Amenas, 1 300 kilometra në juglindje të Algjerit.

E përditshmja frankofone, El Watan, citonte dje burime të sigurisë duke përmendur zbulimin e rreth 30 trupa të pajetë të pengjeve të huaja, vendas dhe ushtarë të ushtrisë algjeriane. "Por numri i viktimave mund të rritet", deklaroi ministri i Komunikacionit, Mohamed Said.

HermesNews - ©2013

Dërgo me email | Stampo artikullin