21/01/2013 09:42:48

Socialistët, '21 Janari pa drejtësi'

Policia e Tiranës ka njoftuar se duke filluar nga ora 10.30 deri në orën 14.00, do të ketë kufizime të qarkullimit rrugor.

(15:00) "Plaga është jo vetëm e hapur. Në të gëlon infeksioni i padrejtësisë. Shqipëria sot është ende më e padrejtë se dy vjet më parë. Vrasjet në bulevard janë pasuar nga një vrasje në çdo seancë të procesit gjyqësor. Plaga e infektuar prej padrejtësisë flet kumbueshëm. Ashtu e infektuar keqaz, ajo bëri të flasin më qartë se asnjëherë deri më sot për 21 janarin edhe Shtetet e Bashkuara, edhe Bashkimi Europian", u shpreh sot kreu i Partisë Socialiste, Edi Rama, për ngjarjen e dy viteve më parë në 21 janar, ku mbetën të vrarë 4 protestues përpara kryeministrisë. Sipas kreut të PS-së, "Shqipëria që kemi është pasojë e mungesës së drejtësisë. Shqipëria që duam do të rilindë përmes sensit tonë të drejtësisë në qeverisjen e saj”.

TIRANË - Ditën e sotme shënohen 2 vjet nga demonstrata e 21 Janarit, ku humbën jetën 4 protestues përpara Kryeministrisë. Partia Socialiste pritet të organizojë një tubim homazh, që do të nisë nga selia e PS-se, për t'u drejtuar më pas në Bulevardin Dëshmorët e Kombit e deri përpara kryeministrisë aty ku u vranë edhe katër protestuesit Ziver Veizi, Hekuran Deda, Faik Myrtaj dhe Aleks Nika.

Në lidhje me këtë tubim të PS, Policia e Tiranës ka njoftuar se duke filluar nga ora 10.30 deri në orën 14.00, do të ketë kufizime të qarkullimit rrugor. Policia sqaron se këto masa merren me qëllim sigurimin e rendit dhe sigurisë publike, duke kryer edhe disa kufizime lëvizjes së mjeteve përgjatë Bulevardit Dëshmorët e Kombit deri në sheshin Nënë Tereza nga ora 10.00 deri më 14.00. Po ashtu, kufizime të mjeteve do të ketë për zhvillimin normal të marshimit homazh, duke filluar nga sheshi Austria deri në afërsi të Kryeministrisë.

Kreu i PS-së Edi Rama deklaroi dje se sot shënohet një tjetër 21 janar pa drejtësi, madje një 21 janar që e gjen procesin gjyqësor në një fazë rrënimi të mëtejshëm. Ndërsa sot shënohet 2-vjetori i 21 janarit ku mbetën të vrarë katër protestues ende nuk ka një vendim nga gjykata në lidhje me këtë ngjarje të rëndë.

HermesNews - ©2013

Dërgo me email | Stampo artikullin