19/01/2013 09:04:58

Pastrohet Autostrada e kombit

Drejtori i Autoritetit të Rrugëve, në rajonin verilindor, Arben Basha, bëri të ditur se reshjet e dëborës që ranë në orët e mëngjesit deri tani nuk kanë shkaktuar bllokime të rrugëve, apo zonave të banuara

KUKËS - Megjithë trashësinë e dëborës në afërsi të tunelit të Kalimashit, 5 borëpastruese po mbajnë të hapur qarkullimin e mjeteve përgjatë gjithë Autostradës së Kombit. Drejtori i Autoritetit të Rrugëve, në rajonin verilindor, Arben Basha, bëri të ditur se reshjet e dëborës që ranë në orët e mëngjesit deri tani nuk kanë shkaktuar bllokime të rrugëve, apo zonave të banuara. Trashësia e dëborës në afërsi të tunelit të Kalimashit ka arritur në 30 centimetra. Në zonat e thella rurale, si ato në afërsi të qafë Shllakut, Shishtavec, Arrën, trashësia e dëborës ka arritur në 50 centimetra, ndërkohë që ndërprerja e reshjeve ka bërë që me pak vështirësi, edhe këto akse të mbahen të hapura. Në akset Kukës -qafë Shllak- qafë Mali, Kukës-Bushtricë, Kukës-Krumë, Krumë-qafë Prushi, etj, për shkak të dëborës dhe shtresave të akullit, është i domosdoshëm përdorimi i zinxhirëve.

HermesNews - ©2013

Dërgo me email | Stampo artikullin