18/01/2013 12:20:34

Dy kandidaturat për IDKP

Komisioni zhvilloi sot një seancë dëgjimore me dy kandidatët e propozuar nga Presidenti, Zana Xhuka dhe Shkëlqim Ganaj

TIRANË - Komisioni parlamentar i Ligjeve miratoi të premten me votat e maxhorancës dy kandidaturat e dekretuara nga Presidenti i Republikës për postin e Inspektorit të Përgjithshëm të Inspektoratit të Lartë të Deklarimit dhe Kontrollit të Pasurive (IDKP).

Komisioni zhvilloi sot një seancë dëgjimore me dy kandidatët e propozuar nga Presidenti, Zana Xhuka dhe Shkëlqim Ganaj, të cilët prezantuan vizionin e tyre lidhur me drejtimin e ILDKP-së.

Kandidatja Xhuka theksoi se nuk është anëtare e asnjë force politike dhe se qëndrimin në detyrën aktuale, atë të zv/ministres së Mbrojtjes, ia dedikon CV-së së saj profesionale.

Edhe kandidati tjetër për kreun e ILDKP-së, Shkëlqim Ganaj tha se nuk ka qënë pjesë e asnjë partie politike dhe se ka punuar në sistemin e drejtësisë prej shumë vitesh.

Anëtarët e opozitës në komision e konsideruan të nxituar shqyrtimin e dy kandidaturavetë dekretuara nga Presidenti. "Kuvendi nuk duhet të nxitojë pasi kjo nuk duhet të jetë një zgjedhje e motivuar politikisht", tha nënkryetari socialist e komisonit Fatmir Xhafaj. Komisioni ia përcolli kandidaturat për votim seancës plenare të së hënës.

HermesNews - ©2013

Dërgo me email | Stampo artikullin