16/01/2013 17:24:44

P/ligji per mediat sipas BE-se

Projektligji duhet të vendosë normalitetin mbi një situatë de facto paligjshmërie të zaptimit të frekuencave dhe që pengon kalimin në transmetime dixhitale

TIRANË - Ministri për Inovacionin, Teknologjinë e Informacionit dhe Komunikimit, Genc Pollo, tha të mërkurën se projektligji për mediat audiovizuale që po shqyrtohet në Kuvend, përshtatet me direktivat e Bashkimit Europian. Sipas tij, projektligji synon të rregullojë veprimtarinë e medias audiovizuale në vend, duke i vendosur të gjithë aktorët në kushte të barabarta, jo diskriminuese.

Duke folur në seminarin e organizuar mbi "Lirinë e medias dhe lirinë e shprehjes në kuadrin e integrimit të Shqipërisë në BE", Pollo tha gjithashtu se ky projektligj është një nismë e Komisionit Kuvendor të Edukimit dhe Mjeteve të Informimit Publik, që punohet prej 7 vjetësh.

"Projektligji duhet të vendosë normalitetin mbi një situatë de facto paligjshmërie të zaptimit të frekuencave dhe që pengon kalimin në transmetime dixhitale. Projektligji duhet miratuar sa më shpejt dhe pas fillimit të punës nga Komisioni në tetor të vitit të kaluar unë shpresoj që kjo të ndodhë në 2-3 javët e ardhshme, sepse nuk ka asnjë arsye tjetër për ta vonuar", tha Pollo.

Sipas tij, “ky projektligj për mediat audiovizuale, njëkohësisht i jep një kornizë tjetër KKRT, rregullatorit, që në të ardhmen do të quhet AMA dhe që duhet të ndjekë rrugën e modeleve të provuara të suksesshme në Evropë e botë, të cilat respektojnë maxhorancën e opozitën e ditës, por që afatmesëm dhe afatgjatë lejojnë kontrollet dhe balancet e duhura dhe forcojnë pavarësinë politike të këtij rregullatori".

Në fjalën e tij, Pollo, njoftoi edhe për dy nisma të tjera të Qeverisë që kanë të bëjnë me përfshirjen në qeverisje siç është projektligji për njoftimin dhe konsultimin publik. Ky projektligj do të vendosë rregulla e norma, procedura dhe afate, në mënyrë që çdo akt i nxjerrë nga Qeveria dhe agjencitë e saj t’i nënshtrohen paraprakisht një konsultimi të plotë me të gjitha grupet e interesuara. Kjo nismë ligjore, tha Pollo, "vjen në kuadër të Partneritetit për Qeverisje të hapur (Open Government Partnership) ku Shqipëria është anëtare”.

Gjithashtu Ministri i Inovacionit dhe TIK njoftoi dhe hartimin e projektligjit për të drejtën e informimit, që do të zëvendësojë atë të vitit 1999, i cili në kushtet e shoqërisë së informacionit ka dalë jashtë kohe. Sipas tij, këto dy ligje synohet që muajt e ardhshëm të dërgohen për miratim në Kuvend.

HermesNews - ©2013

Dërgo me email | Stampo artikullin