15/01/2013 17:40:37

Ekstradohet nga Italia i shumekerkuari per vrasje Jetmir Liani

Gjatë një konference për shtyp, zëdhënësi i Policisë së Shtetit, Tefik Sulejmani, bëri të ditur se i ekstraduari Jetmir Llani ishte shpallur në kërkim ndërkombëtar si autori i dyshuar i ngjarjes së ndodhur më datë 4 nëntor 2012 në Mamurras, ku mbeti i vrarë shtetasi Gentjan Shkreta dhe u plagos vëllai i tij Aurel Shkreta

TIRANË - Zyra Qendrore Kombëtare Interpol Tirana, gjatë mesditës së sotme, ekstradoi nga Roma, Itali, drejt Shqipërisë, të shumëkërkuarin për vrasje, Jetmir Isuf Llani, 34 vjeç, nga Kurbini.

Gjatë një konference për shtyp, zëdhënësi i Policisë së Shtetit, Tefik Sulejmani, bëri të ditur se "i ekstraduari Jetmir Llani ishte shpallur në kërkim ndërkombëtar si autori i dyshuar i ngjarjes së ndodhur më datë 4 nëntor 2012 në Mamurras, ku mbeti i vrarë shtetasi Gentjan Shkreta dhe u plagos vëllai i tij Aurel Shkreta. Ky shtetas u arrestua me qëllim ekstradimi, me datë 20 nëntor 2012, si rezultat i bashkëpunimit dhe shkëmbimit në kohë të informacionit ndërmjet Zyrës Qendrore Kombëtare Interpol Tirana me Interpol Roma Itali".

Gjykata e Rrethit Gjyqësor Kurbin, shtoi zëdhënësi i Policisë së Shtetit, "ka caktuar ndaj këtij shtetasi masën e sigurisë “Arrest në burg“, për kryerjen e veprës penale të “Vrasjes me paramendim“ , e kryer në bashkëpunim dhe armëmbajtjes pa leje, parashikuar nga nenet 78/2, 25 dhe 278/2 të Kodit Penal".

Gjatë vitit 2012 strukturat e Drejtorisë së Bashkëpunimit dhe Koordinimit Ndërkombëtar në Policinë e Shtetit, si rezultat i bashkëpunimit të frytshëm me strukturat qendrore dhe vendore të policisë, si dhe me homologët ndërkombëtar, kanë bërë të mundur arrestimin me qëllim ekstradimi drejt vendit tonë të 66 shtetasve shqiptarë të shpallur në kërkim ndërkombëtar.

Po nga këto struktura janë arrestuar me qëllim ekstradimi drejt vendeve të tjera 113 shtetas të shpallur në kërkim ndërkombëtar. Po ashtu, nga Drejtoria e Koordinimit dhe Bashkëpunimit Ndërkombëtar janë ekstraduar drejt Shqipërisë 71 persona të shpallur në kërkim ndërkombëtar. Njëkohësisht janë ekstraduar drejt vendeve të tjera 63 persona të kërkuar.

Gjithashtu si rezultat i bashkëpunimit me Prokurorinë e Përgjithshme janë përfunduar procedurat dhe janë shpallur në kërkim ndërkombëtar 136 shtetas të kërkuar nga autoritetet shqiptare të drejtësisë, si dhe janë plotësuar procedurat për 124 shtetas shqiptar të kërkuar nga organizatat homologe ndërkombëtare.

HermesNews - ©2013

Dërgo me email | Stampo artikullin