14/01/2013 08:22:30

Krimi jashtë, valë e pasurive brenda kufinjve: 6 politikanë nën hetim

Për vitin 2012 kemi 6 raste politikanësh, pra persona të ekspozuar politikisht...të zgjedhur apo emëruar, që kanë mundësi të abuzojnë me detyrën

TIRANE - Kreu i Drejtorisë së përgjithshme të pastrimit të parave Arben Doçi tha në një intervistë për mediat shqiptare se pjesa më e madhe e parave të pista prodhohen nga krimi jashtë kufijve, investohen në pasuri të paluajtshme, hoteleri dhe restorantete.

Një raport i Global Financial Intergrity publikoi se nga Shqipëria janë larguar në formën e transfertave të paligjshme një total fondesh, që shkojnë në $1.3 milionë.

Sipas Doçit "raporti i GIF krahason vetëm bilancet e pagesave bankare me bilancet tregtare, pa ofruar asnjë të dhënë tjetër mbi këto flukse".

"Për vitin 2011 kemi dërguar 160 raste për investigim të mëtejshëm në Policinë e Shtetit dhe 51 raste në prokurori. Për vitin 2012 janë dërguar për investigim të mëtejshëm në polici 171 raste, ndërsa 34 të tjerë janë dërguar në prokurori", tha ai.

"Pjesa dërrmuese e rasteve që janë dërguar në prokurori kanë si origjinë trafikun e drogës dhe prodhimin e lëndëve narkotike...mjaft raste parash të pista të përfituara nga trafiku i qenieve njerëzore...një pjesë të mirë të rasteve e zë korrupsioni...në vitin 2011 kemi pasur 18 raste të raportuara me para të përfituara që kanë si vepër origjine korrupsionin. Nga 51 raste të referuara në prokurori për vitin 2011, 25 prej tyre kanë pasur veprën penale të trafikut të lëndëve narkotike, pas tyre vijnë veprat penale të mashtrimit e falsifikimit, ndërsa 5 raste kanë orgjinë korrupsionin...për vitin 2012 kemi 6 raste politikanësh, pra persona të ekspozuar politikisht...të zgjedhur apo emëruar, që kanë mundësi të abuzojnë me detyrën. Por këtu përfshijmë edhe gjyqtarët, edhe prokurorët. Këta persona kanë si vepër origjine korrupsionin. Por nga ana tjetër mund të përdoren nga organizata kriminale apo kriminelë për t’i ndihmuar me segmente të caktuara shtetërore, siç është gjyqësori. Para pak ditësh, kryeprokurori Adriatik Llalla vërente një problem të tillë", tha ai.

HermesNews - ©2013

Dërgo me email | Stampo artikullin