12/01/2013 18:19:31

Rrugë ferri

nga Marko Bello

TIRANE - Dikur i vetmi vend ku nuk lejoheshin makinat private, sot Shqiperia numuron rreth 420 mijë automjete, nga të cilat rreth 2100 autobuzë, 4500 kamionë, mbi 10.000 furgonë e miniautobuzë, krahas mijëra traktorëve dhe autoveturave. Për pasojë, është rritur ndjeshëm edhe numuri i aksidenteve rrugore me pasojë vdekjen e mijëra qytetarëve.

Krahas shpejtësisë tej normave të lejuara, abuzimit me alkoolin apo vjetersisë dhe amortizimit të automjeteve, një nga shkaqet kryesore që ka çuar në rritjen e aksidenteve automobilistike nga njeri vit në tjetrin lidhet me gjendjen skandaloze të rrjetit rrugor në mbarë vendin, mungesën e sinjalistikës rrugore dhe të ndriçimit adekuat të segmentëve rrugore.

Sipas të dhënave të Institutit shtetëror të Statistikave (Instat), në vitin 2010 u regjistruan 1.564 aksidente rrugore, ku u dëmtuan 2.069 persona, nga të cilët 353 vetë humbën jetën.

Megjithëse koalicioni i djathtë qe qeveris vendin nga Vjeshta e vitit 2005 mburret se ka ndërtuar mbi 8000 km rrugë nacionale dhe rurale, vendi ende nuk ka një plan kombëtar të zhvillimit të infrastrukturës rrugore dhe transportit.

Në shumë raste ndërtohet në mënyrë spontane, priten shirita elektorale sa për të sugjestionuar zgjedhësit, ndërkohë që sektori rrugor mbetet sektori ku kryhen abuzimet më të mëdha me fondet e taksapaguesve shqiptarë apo të donatorëve të Shqipërisë.

Mbi 150 milionë dollarë mendohet se është shifra e borxhit që qeveria i detyrohet kompanive private të ndërtimit të rrugëve, një tregues kokëfortë ky i papërgjegjshmërisë, politikave abuzive dhe arrogancës që manifeston qeveria e Sali Berishës, e cila trumbeton se po ndërton rrugë të standarteve ndërkombëtare.

Por, realiteti është krejt i kundërt me propagandën e shpëlarë të qeverisë, e cila ka hapur fronte pune jashtë mundësive dhe kapaciteteve, duke filluar dhe lënë në mes shumë akse rrugore të rëndësishëm për vendin, për të mos folur për cilësine e keqe të mjaft segmenteve rrugore në mbarë vendin.

E pagëzuar si “Rruga e Kombit”, rruga Durrës-Kukës-Morinë, e cila ka kushtuar më shumë se 1 miliardë USD po degradon dhe në shumë pjesë të saj rezulton e dëmtuar rëndë, duke u kthyer në një burim aksidentesh, sidomos gjatë stinës së verës, kur intensiteti i qarkullimit në të rritet.

Nëse edhe kjo rrugë, për ndërtimin e të cilës ka patur akuza serioze për korrupsion nga organi i Prokurorisë së Përgjithshme, nuk paraqit më siguri dhe garanci për jetën e qytetarëve, gjendja në segmentet e tjera rrugore është jashtë çdo standardi dhe krejt e papranueshme.

Të kredhura në errësirë, pavarësisht shtyllave të ndriçimit që kanë mbirë në çdo 10 m si kërpudhat pas shiut, pa sinjalistikën e nevojshme, pa mure mbrojtëse dhe gjithë gropa për shkak të cilësisë së dobët të shtresës së asfaltit, rrugët e Shqipërisë janë kthyer në rrugë ferri për drejtuesit e automjeteve dhe udhëtarëve që ndodhen në çdo moment përpara rrezikut të humbjes së jetës apo gjymtimeve që vijnë për shkak të aksidenteve fatalë në të katër cepat e vendit.

Ndonëse çdo drejtues automjeti është i detyruar të paguajë 19 mijë lekë në vit për taksën e qarkullimit, përveç kontrollit të kolaudimit të makinës dhe taksës së karburantit, gjendja e rrugëve vijon të mbetet problematike.

Mungojnë sinjalistikat vertikale, horizontale dhe elektronike, ndërsa projektet në zbatim lihen përgjysmë dhe shfrytëzimi i rrugëve fillon me të meta teknike. Rrugët merren në dorëzim pa përfunduar dhe në shumë raste pa raportin e supervizorëve, të cilët duhet thënë se korruptohen dhe meritojnë të ndiqen penalisht.

Në jo pak raste, supervizorët janë përfaqësues të investitorit dhe që këtu fillon konflikti i interesit. Nuk ka masa kontrolli nga institucionet e ngarkuara me ligj dhe përfaqësuesit e shtetit lëvizin dhe bëhen të gjallë vetëm në raste të aksidenteve të rënda, sikurse ai i Himarrës, në të cilin humbën jetën 13 studente dhe 22 u plagoën rëndë.

Në programin e saj për një Rilindje kombëtare, Partia Socialiste propozon një tjetër qasje sa i përket mënyrës se si duhen ndërtuar dhe mirëmbajtur rrugët, larg frymës klienteliste, amatoreske dhe abuzive të kësaj qeverie në ikje, duke u impenjuar dhe angazhuar maksimalisht dhe me seriozitetin e duhur për një strategji kombëtare dhe alokim fondesh të qenësishëm për të adresuar urgjentisht këtë problem madhor për zhvillimin e vendit dhe ribashkimit të tij me Europën.

HermesNews - ©2013

Dërgo me email | Stampo artikullin