12/01/2013 10:06:02

Kukes, reshje debore

Reshjet e dëborës nuk kanë shkaktuar ndonjë shqetësim edhe në akset rrugore të rajonit, ku shqetësimi kryesor janë shtresat e akullit të krijuara si rrjedhojë e uljes së ndjeshme të temperaturës

KUKËS - Pas mesnatës janë rishfaqur reshjet e dëborës që kanë përfshirë thuajse gjithë zonën verilindore. Reshjet e dëborës, me intensitet të ulët, nuk kanë shkaktuar ndonjë shqetësim për banorët edhe pse u janë afruar edhe qyteteve. Kjo edhe për faktin se trashësia e saj ka arritur vetëm në rreth 10 centimetra në zonat e prekura.

Reshjet e dëborës nuk kanë shkaktuar ndonjë shqetësim edhe në akset rrugore të rajonit, ku shqetësimi kryesor janë shtresat e akullit të krijuara si rrjedhojë e uljes së ndjeshme të temperaturës. "Pavarësisht reshjeve të dëborës akset rrugore janë të kalueshme.

Vetëm në disa prej akseve rrugore si Kukës -Qafë Prush, Kukës - Krumë, Krumë - Bajram Curri, Bajram Curri - Qafë Mali përdorimi i zinxhirëve është i domosdoshëm për shkak të shtresave të akullit, por edhe dëborës së rënë gjatë natës", thotë përgjegjësi i zyrës së emergjencës civile në prefekturën e Kukësit, Azem Tema.

Pavarësisht reshjeve të dëborës, ende të gjitha akset rrugore të zonës verilindore janë të kalueshme dhe nuk është regjistruar ndonjë fshat i izoluar, duke përjashtuar komunën e Arrnit, që vazhdon që prej një muaji të jetë e izoluar.

Ndërkohë, nga firmat që kanë marrë me koncesion mirëmbajtjen e akseve rrugore janë vënë në gatishmëri mjetet borëpastruese, nëse reshjet e dëborës për të mbajtur hapur akset kryesore rrugore.

HermesNews - ©2013

Dërgo me email | Stampo artikullin