10/01/2013 17:54:11

Dy 'luanë' në rrjete sociale: Berisha si ditar - Rama për fushatë

nga Doriana Metollari

HermesNews - Një baba-kryeministër online - > Berisha hyri në rrjetin social, të paktën zyrtarisht. Një eksperiment individual që ai po bën për herë të parë në këto prag zgjedhjesh. K/ministri me faqen e tij të Facebook-ut, brenda një muaji ka mbledhur rreth 342 mijë fansa, çfarë do të thotë se popullariteti i tij është i lartë dhe jo pa shkak, duke parë karrierën politike që ka.

Ai ka një faqe e cila sipas të dhënave entuziaste që ka publikuar, është ndjekur deri tani nga 1,7 deri në 2 milionë vizitatorë me një moshë mesatare 34 vjeç. K/ministri shqiptar u është “shfaqur” njerëzve dhe faqja e tij, është një formë “ditari personal”, me pjesë nga jeta private. Ai është ende në kërkim të avantazheve pro dhe kundër të të qënurit në një rrjet social, meqë faqja e tij është krijuar vetëm një muaj para. Berisha këtë hapësirë e përdor për momente festive dhe kujtime që ndan me njerëzit, por nuk mungojnë dhe ironitë ndaj kundërshtarit politik Edi Rames. Falenderon gjithmonë në çdo mesazh "miqtë", me firmën në fund "sb" dhe kjo e shfaq në sy të friends-ave që ka, si një njeri normal dhe i rrit afrimitetin me ta.

Shumë e rëndësishme për politikanët !

Shikoni fotot që publikon stafi i i Presidentit Amerikan Barack Obama. Janë të gjitha nga jeta e tij "e përditshme" me fëmijët dhe bashkëshorten e vet. Një lider është dhe baba e bashkëshort, a nuk e bën kjo dhe shumë qytetar ?

Sejcili kryetar shteti do të mund të publikonte foto me personazhe që njerëzit e thjeshtë as nuk shpresojnë se mund t’i takojnë një ditë, por fakti që ata zgjedhin pika të përbashkëta me qytetarët, u jep avantazhe të tjera në sy të tyre.

A nuk po i jep dhe kjo popullaritet Berishës ?

K/ministri nuk jep lajme që më përpara nuk dërgohen nga zëdhënësat e tij, ndryshe nga Rama, por në këmbim ka bërë ndonjë "premtim". Sigurisht do t'i jepte dhe më shumë pikë nëse ai do të publikonte dhe lajme të shkurtra nga aktiviteti i tij politik, apo histori që pritet të ndodhin. Profili i Berishës në Facebook nuk është në të njëjtën linjë me Ramën, por besoj se gjatë muajve të fushatës, qytetarët do të shohin sesi ai do t'a ndryshojë përmbajtjen e gjithë kësaj.

Një lidër gjithnjë në ndërtim të vizionit - > Nga ana tjetër është dhe socialisti Edi Rama online. Ai identifikohet në pjesën më të madhe me Twitterin ku ka rreth 44,120 follower. Kush e ndjek, arsyeton sidomos për programin e tij elektoral, çfarë tregon se Rama ka nisur (prej kohësh) fushatën elektorale Online.

Kandidati për postin e kryeministrit të shqiptarëve është hedhur në sulm shumë më herët, çfarë është e kuptueshme për pozicionin e tij në opozitë. Ai ndikon dhe në rritjen e popullaritetit të degëve të PS-së në vende të BEsë si Italia apo Greqia.

Demokratët kanë ndjekur, kryesisht, të njëjtën vijë tradicionale informimi, (nëpërmjet zëdhënësave), ndërsa socialistët, për të mbrojtur idetë e veta brenda PS-së apo jashtë saj, janë më aktiv nëpër profilet e tyre online, kjo justifikohet dhe nga debatet që kanë brenda forcës politike.

Disa politikanë preferojnë të publikojnë lajme që s’kanë lidhje të drejtpërdrejtë me ta, por që i marrin nga mediat. Kjo në pozicionin e tyre mund t'u japë një "jo avantazh": e kundërta do t'u vlente më shumë.

Njerëzit i ndjekin për të parë më tepër komentet e tyre, apo për t’u dhënë informacione nga aktiviteti vetjak politik. Gjithsesi, risia dhe avantazhi i gazetarëve është se këto të fundit i marrin qëndrimet, (në raste kur japin lajme) direkt nga shumë politikanë në kohë reale në profilet përkatëse.

Komentet e politikanëve, gazetarët i përdorin si qëndrime zyrtare për ngjarjet, qoftë dhe solidariteti që shfaqin, por jo rallë herë (politikanët) përballen dhe me mllefet e fansave. Shumë demokratike, pasi kjo bën që ata të mos harrojnë se ekziston një botë reale jashtë privilegjeve.

Edi Rama nuk publikon detaje nga jeta e tij private (ose shumë pak). Kjo tregon se përdorimi i rrjetit social është i drejtuar për ndërtimin e vizionit që do për Shqipërinë.

Nëpërmjet kësaj strategjie të "përfshirjes-aktive" në politikën socialiste, ai rrit popullaritetin dhe ndaj atyre që shkojnë "të pavendosur" nëpër kutitë e votimit, apo qytetarëve jashtë.

Roli i zëdhënesave në (?) Një risi e kohëve të fundit të rrjeteve sociale është se lajmet, personazhet, i japin direkt nëpër profile, në kohë reale, pa kaluar në duar të zëdhënësave që i përpunojnë vetëm kur ka interes më të përgjithshëm.

Deri atëherë mediat e kanë transmetuar lajmin dhe komunikata u shërben vetëm për të ditur qëndrimin zyrtar që mban një forcë politike, ose për detaje që vlejnë.

Kjo mënyrë informacioni brenda profileve, u shërben gazetarëve për të kuptuar orientimin dhe evolimin opinionit publik. Në një farë mënyrë ata bëhen dhe ndjekës të ndryshimeve. Lexuesit sot nuk kanë më nevojë të lexojnë të përditshme për të ditur se çfarë ka ndodhur por për të parë detaje që nuk i gjetur online dhe një përmbledhje të lajmit që në internet e kanë gjetur të shpërndarë.

Gjithsesi, është evidente se kjo fushatë mund të bëhet kudo, qoftë derë më derë, nëpër salla, shtëpi, sheshe, por është po kaq evidente, se i gjithë ky aktivitet politik, do të përmblidhet mbi të gjitha dhe vetëm online, i vetmi vend ku do të takohen të gjithë si të barabartë.

HermesNews - ©2013

Dërgo me email | Stampo artikullin