10/01/2013 11:30:22

'Rrugë të pastra', 6 të arrestuar për vjedhje

Arrestimi në flagrancë i gjashtë shtetasve u bë pasi kanë kryer një sërë vjedhjesh në objekte të ndryshme në qytetin e Elbasanit gjatë fillimit të këtij viti si dhe në Peqin

ELBASAN - Policia lokale e Elbasanit, gjatë operacionit të koduar "Rrugë të Pastra 2", arrestoi gjatë orëve të natës dhe mëngjesit të sotëm gjashtë persona, të cilët akuzohen për veprën penale të 'vjedhjes'.

Burime të Policisë bënë të ditur se "arrestimi në flagrancë i gjashtë shtetasve u bë pasi kanë kryer një sërë vjedhjesh në objekte të ndryshme në qytetin e Elbasanit gjatë fillimit të këtij viti si dhe në Peqin".

Në këtë kuadër, Policia ka arrestuar autorët e vjedhjeve, të cilët janë Abdyl Quku dhe Xhuljan Cuku, respektivisht 50 dhe 18 vjeç, atë e bir, pasi së bashku dilnin në orët e vona të natës dhe vidhnin pasqyrat e mjeteve të parkuara në vende të ndryshme të qytetit.

Nga kontrolli i banesës së tyre, iu gjetën dhe iu sekuestruan pesë palë pasqyra të llojeve të ndryshme. Në vijim të operacionit janë arrestuar adoleshentët F.C si edhe Xh.Z, që të dy 16 vjeçare, pasi në bashkëpunim me njëri tjetrin kanë vjedhur dy magazina në lagjen "Beqir Dardha", nga ku kanë vjedhur material hekuri për skrap.

Policia ka arrestuar sërisht një 16 vjeçar nga Peqini si autor të vjedhjes së një magazine dhe banese të shtetasit me inciale S. SH, ndërsa është arrestuar edhe Haxhi Haricari, person i shpallur në kërkim pasi është autor i vjedhjes së një banese në Peqin, nga ku ka marrë 60 mijë lekë të reja, ngjarje e ndodhur në fillim të vitit.

Gjashtë personat e arrestuar ndodhen në godinën e paraburgimit në pritje të hetimeve për veprën penale të "vjedhjes".

HermesNews - ©2013

Dërgo me email | Stampo artikullin