09/01/2013 11:13:14

Drejtësi për Aishën: Shaban Norja kërkon gjykim të shkurtuar

Në dosjen 'Norja' ka një numër të madh akt-ekspertizash të viktimës dhe të ekzekutorit

DURRES - Tre muaj pas vrasjes makabre të 18- vjeçares Aishe Vata në fshatin Xhafzotaj të Durrësit, sot në Gjykatën e Shkallës së Parë nis proçesi ndaj Shaban Norja. Avokati mbrojtës ka kërkuar gjykim të shkurtuar për të moshuarin. Ai ka pranuar para trupit gjykues autorësinë e krimit dhe atësinë e fetusit 3 muajsh.

Në dosjen “Norja” ka një numër të madh akt-ekspertizash të viktimës dhe të ekzekutorit. Mes provave të shumta të grumbulluara nga prokuroria e Durrësit janë dhe tabulatet e dy numrave celularë Vodafone Club, me të cilët komunikonin 80-vjeçari Shaban Norja dhe 18-vjeçarja Aishe Vata. Nga të dhënat në dosje rezulton se gjatë periudhës shtator-tetor të vitit 2012 ka një numër shumë të madh thirrjesh telefonike mes viktimës dhe vrasësit, të cilat zgjasin nga 2 minuta deri në 35 minuta.

Relatorja e çështjes, Shpëtime Pitaku deklaroi se dosja “Norja” është një nga dosjet më voluminoze dhe se deri tani janë parashikuar të thirren 17 dëshmitarë nga gjykata në proces. "Mbase Prokuroria do të kërkojë më shumë, por nëse i pandehuri do të pranojë gjykimin e shkurtuar, nuk do të jetë e nevojshme të thirren të gjithë dëshmitarët e ngjarjes". Në gjyq do të dëshmojnë të afërmit e viktimës; babai, Muhamet Vata; xhaxhai, Sulejman Vata; motra, Tefta Vata; njerka e 18-vjeçares, Refije Vata; si dhe persona të tjerë

gazeta shqiptare

Dërgo me email | Stampo artikullin