09/01/2013 09:09:56

Kur të shket këmba dhe jo Toka nën këmbë

nga Erion Kristo

TIRANE - Nuk më kanë pëlqyer ndonjëherë linçimet publike, dhe aq më tepër kur të linçuarit janë dhe familjarë. Ndoshta na mungon respekti për familjen, ndoshta na mungon respekti për veten, po e shoh shpesh të ngritur gijotinën mishngrënëse që ulërin për trupa njerëzorë, të cilët duhet të flijohen thjesht sepse gijotinës publike nuk i kemi dhënë ushqimin e duhur, dhe është më kollaj ta ushqesh me ushqim dosido.

Shumë njerëz u ndien të turpëruar, se një bashkëkombës i tyre u dyshua se kishte vjedhur ca tesha në një dyqan amerikan. Por nuk u turpëruan aspak mijëra njerëz të tjerë, duke filluar nga sportistët shqiptarë të dënuar ligjërisht për shkelje të tilla, te diplomatë që kanë bërë shkelje edhe më të mëdha, e te mijëra të tjerë që i kanë kthyer supermarketet në zona gjahu.

Shqetësues është fakti se peshkaqeni po mësohet me mish njeriu, dhe thonë se paskëtaj ai nuk kërkon më mish tjetër. Është kthyer në normë në këtë vend, që mjafton të të shkasë këmba, se edhe qentë mund të të përmjerin. Duke harruar shumë keq këshillën ungjillore për të mos parë qimen në syrin e tjetrit, po traun vetjak. Dhe ky trau na është ngulur aq thellë, sa nuk bëzajmë dot. Të kujton ethet e arit, ku po të të shkiste këmba, të shqyenin ujqërit.

Por le të shpresojmë se kjo hakërrimë e madhe e kolektivitetit të fyer nga gjesti, që ende nuk është gjykuar nga një gjykatë, por thjesht është hetuar, të kthehet edhe ndaj atyre që e kanë marrë në qafë këtë vend. Pra, e njëjta ndjenjë përbuzjeje, e njëjta ndjenjë përjashtimi nga radhët. Ndoshta do të përjashtojmë nga radhët tona studiues me vepra të vjedhura, apo doktorë që vdesin pacientët, apo fermerë që gjenetizojnë produktet, apo shitës dyqanesh që fshijnë kadencat, e kështu me radhë.

Pra, ndoshta do të jemi po kaq agresivë me të gjitha të këqijat që na rrethojnë për të na shqyer, me shinat e trenit që duan mish njeriu, me gomat e makinave, me telat e korrentit, me flakët e zjarrit, me bombolat e gazit, me gjyqtarët miliarderë.

A e dini ju bashkëkombës shpesh të padashur, se ligji të dënon edhe për veprime edhe për mosveprime ? Pra, i bie që duhej të kishim edhe një herë burgje sa kemi, vetëm për të alokuar një dynja me njerëz që rrojnë të qetë në shtëpitë e tyre, por që e kanë shkatërruar opinionin dhe moralin publik, edhe pse nuk kanë bërë ndonjë gjë nga ato që ne jemi mësuar të pështyjmë.

Është tërbuese ideja se mund t’i hedhësh thonjtë në fyt një njeriu që i shket paksa këmba. Kjo tregon mungesë qytetërimi. Dhe kjo ndodh pikërisht kur ne po na shket toka nën këmbë. Dhe jo vetëm kur ndërtohen rrugë pa asnjë lloj kriteri, apo shtëpi në faqe kodrash. Ne po na shket toka publike nën këmbë, e shitur për 1 euro apo e grabitur për merak. Ne po na shket trualli social, duke prodhuar mutacione gjenetike krejt të papranueshme, të cilat ne për më tepër i anashkalojmë ose i pranojmë, duke theksuar mungesën tonë të forcës publike.

Nëse keni mendere thuajani gjërat që nuk shkojnë tjetrit në fytyrë, dhe mos prisni të fërkoni duart kur dikush gabon. Unë për vete dua që të mi falin gabimet dhe të tregohen zemërgjerë me mua. Ashtu dua t’i trajtoj edhe të tjerët. Bëhuni pak të gjerë, se shpesh tregoheni të ngushtë.

Ose nëse doni të jeni të ngushtë, tregohuni po kaq të egër me ata që kanë dekada që na dhunojnë. Ata që kanë bërë çmos që ne të na shkasë toka nën këmbë. Dhe ndoshta do të ishin ata që duheshin shkelur me këmbë. Po ne zgjedhim gjithmonë të kënaqemi me fatkeqësinë e tjetrit dhe të bëjmë si puritanë. Këta puritanë na kanë marrë në qafë në mijëravjeçarë. Dhe pikërisht këta puritanë duhen shkulur nga rrënjët.

HermesNews - ©2013

Dërgo me email | Stampo artikullin