08/01/2013 16:11:07

Kode gri për votën e Qershorit, e verdha për rezervat: ok, socialistëve

40 mijë euro për blerje të reja për kodet e sigurisë

TIRANË - Komisioni Qendror i Zgjedhjeve (KQZ) miratoi të Martën me shtatë vota aktin që përcakton modelin e kodeve të sigurisë që do të përdoren për zgjedhjet e 23 qershorit.

Akti i propozuar nga administrata zgjedhore parashikonte përdorimin në zgjedhje të vulës me kode sigurie për mbylljen e kutive të votimit dhe materialeve zgjedhore, të njëjtë me atë të përdorur në zgjedhjet vendore të 2011-s.

Por, përfaqësuesi i i Partisë Socialiste të opozitës, pranë KQZ-së, Genci Gjonçaj propozoi blerjen e kodeve të reja të sigurisë dhe me ngjyra të ndryshme nga ato të propozuara nga Komisioni. Me konsensus anëtarët e KQZ-së ranë dakord për blerje të kodeve të reja me një vlerë prej 40 mijë eurosh.

Sipas vendimit si element sigurie në këto zgjedhje, kodet që do të përdoren do të jenë në ngjyrë gri të thellë, ndërsa kodet rezervë do të jenë me ngjyrë të verdhë. Administrata nga ana e saj kishte propozuar kodet e përdorura në zgjedhjet e 2011-s, përkatësisht me ngjyrë gri dhe të gjelbër.

Kutitë e votimit dhe ato të materialeve zgjedhore mbyllen me vula/kode të posaçme sigurie, ku element identifikues është një numër unik gjashtë shifror.

HermesNews - ©2013

Dërgo me email | Stampo artikullin