03/01/2013 12:08:29

Kukës-Shishtavec, i vështirë për t'u kaluar

Thuajse të izoluar prej afro një muaji janë banorët e komunave të Shishtavecit dhe Topojanit

KUKËS - Mungesa e reshjeve në ditët e para të këtij viti ka lehtësuar lëvizjen në të gjitha akset rrugore të zonës verilindore. "Të gjitha akset rrugore janë të kalueshme edhe pse në zonat e thella malore, shtresat e akullit janë të pranishme në segmente të veçanta", thotë drejtori i autoritetit rrugor të rajonit të Kukësit, Arben Basha.

Sipas tij, në këto ditë kur rritet ndjeshëm fluksi i lëvizjes së udhëtarëve, është normalizuar lëvizja e mjeteve në segmentin e autostradës Morin-Kukës-tunel si dhe në akset rrugore Kukës- Peshkopi, Kukës-Qafë Shllak, Kukës-Krumë -Bajram Curri, Fierzë- Qafë Mali dhe Fierzë- Qafë Morin".

Thuajse të izoluar prej afro një muaji janë banorët e komunave të Shishtavecit dhe Topojanit. "Lëvizja në segmentin afër fshatit Nimce, thuajse ëhstë e pamundur për shkak të rrëshqitjeve të dherave e gurëve mbi trasenë e rrugës, gjë që ka sjellë edhe bllokimin e saj. Bllokimi i këtij segmenti rrugor që sjell edhe izolimin e fshatrave të dy komunave është rrjedhojë e punimeve që po kryhen për ndërtimin e hidrocentraleve të vegjël, duke shkaktuar edhe rrëshqitjen e dherave mbi trasenë e rrugës", thekson Basha.

"Situata është e rënduar, pasi banorët janë thuajse të izoluar në këtë periudhë dimri. I kemi kërkuar firmës ndërtuese të hidrocentraleve të gjejë rrugën e zgjidhjes për rihapjen e rrugës, por një gjë e tillë po zvarritet", shprehet kryetari i komunës së Shishtavecit, Dylejman Nela. Ndërsa vetë banorët pohojnë se, izolimi në këtë periudhë dimri u ka shkaktuar mjaft shqetësime.

Aksi rrugor Kukës- Shishtavec, 37 kilometra i gjatë, i ndërtuar përgjatë kanionit të grykës së Vanave, po rikonstruktohet tërësisht. Deri tani procesi ka përfunduar në 2 lotët e para që jo vetëm janë zgjeruar, por edhe asfaltuar, ndërsa sapo ka nisur puna në lotin e tretë e të fundit dhe punimet pritet të përfundojnë brenda këtij viti.

HermesNews - ©2013

Dërgo me email | Stampo artikullin