03/01/2013 10:11:43

Albstat, socialistët mund të fitojnë zgjedhjet

Shifrat/ PS: 40.40%, PD: 31.40%, AK: 15.20%, LSI: 4.90%, FRD: 4.90%, PDIU : 0.60%, Parti të tjera: 2.60%, Total: 100.00%

TIRANE - Partia Socialiste do jetë fituese në zgjedhjet e vitit 2013. Këtë përfundim nxori sondazhi, që publikohet 6 muaj para zgjedhjeve, ndërsa Partia Demokratike paraqitet me 9 pikë më pak se në vitin 2009.

Një sondazh i organizuar nga Qendra e Kërkimeve Shkencore dhe të Dhënave, “Albstat”, tregon se në zgjedhjet e ardhshme, Partia Socialiste do të marrë 40.4 për qind.

Sondazhi u zhvillua me vizita në shtëpitë e të anketuarve, bazuar në një kampion statistikor të përbërë nga 1100 votues, 600 prej të cilëve banojnë në zonat urbane dhe 500 në zonat rurale.

Nga përgjigjet e të anketuarve, rezultoi se 77.1% e tyre do të merrnin sot pjesë në zgjedhje, ndërsa 67.7% deklaruan edhe se për cilën parti do të votonin.

Sipas këtij sondazhi, preferencat për partitë politike ishin: PS 40%, PD 31.40%, AKZ 15.20%, LSI 4.9%, FRD 4.9%, PDIU 0.60%, të tjerët 2.6%.

Nga preferencat e atyre që e deklaruan votën, konstatohet se PS-ja mbetet në kuotat e zgjedhjeve të 2009-s, ndërsa PD-ja duket se ka pasur një rrjedhje që është kanalizuar kryesisht drejt dy partive të reja.

Për të anketuarit që u shprehën se do të merrnin sot pjesë në zgjedhje, por që nuk e deklaruan preferencën për partitë, nuk kemi informacion të mjaftueshëm të parashikojmë se nga mund të anojnë.


Dy javë më parë, në Tiranë u publikua një tjetër sondazh i kryer nga fondacioni “Kult” me qendër në Tetovë, i cili e rendiste opozitën shqiptare si fituese me 54 për qind dhe mazhorancën e paraqiste në një mbështetje me 34.4 për qind të votave.

HermesNews - ©2013

Dërgo me email | Stampo artikullin