02/01/2013 10:50:44

Politika gjate vitit 2012-te

Permbledhje e lajmeve te dites

TIRANË - Kremtimi madhështor i 100-vjetorit të Pavarësisë së Shqipërisë, zgjedhja e Presidentit të Republikës, marrja nga Shqipëria e presidencës së Komitetit të Ministrave të Këshillit të Europës, vizita në Tiranë e sekretares së Shtetit, Hillari Klinton, miratimi i reformës zgjedhore, miratimi i prokurorit të Përgjithshëm, etj, janë disa nga zhvillimet më të rëndësishme politike të vitit 2012, që po mbyllet.

Më poshtë vijojnë zhvillimet kryesore të politikës shqiptare gjatë periudhës janar-maj 2012

JANAR

23 janar - Prokuroria e Përgjithshme kërkoi arrestimin e Komandantit të Gardës, Ndrea Prendi, të shoferit të tij, Margarit Kume, si dhe shefit të IT-së së kryeministrisë, Armando Kasaj, lidhur me rolin e tyre në ngjarjet e 21 janarit, ku humbën jetën 4 protestues dhe u plagosën me dhjetra të tjerë, civilë e ushtarakë.

25 janar - Kryeministri Sali Berisha pezullon nga detyra Komandantin e Gardës, Ndrea Prend.

26 janar - Kuvendi miraton ngritjen e komisionit hetimor për veprimtarinë e zv/kryetarit të KLD-së, Kreshnik Spahiu, e kërkuar nga një grup deputetësh të PD-së, me argumentin se ai po shkel ligjin dhe po abuzon me postin e lartë për t’u marrë me veprimtari politike.

SHKURT

1 shkurt - Këshilli i Ministrave miraton programin ekonomik e fiskal të Shqipërisë 2012-2014, i cili ka objektiv rritjen e të ardhurave dhe uljen e papunësisë.

2 shkurt - Shqipëria nënshkruan një marrëveshje me Bashkimin Europian, që parashikon financimin e 82 milionë eurove për projekte të ndryshme në dy vitet e ardhshme në fushën e infrastrukturës, mbështetjen e sistemit të drejtësisë dhe mbrojtjes së të drejtave të njeriut.

2 shkurt - Kuvendi miraton heqjen e imunitetit të tre deputetëve socialistë Taulant Balla, Tom Doshi dhe Besnik Baraj, sipas kërkesës së prokurorisë, e cila po heton aktivitetin e tyre në ngjarjet e dhunshme të 21 janarit.

7 shkurt - Qeveria vendos të ngrejë një Komitet Ndërministror të Emergjencës, pas vështirësive të krijuara në zona të shumta të vendit për shkak të reshjeve të dendura të dëborës dhe temperaturave të ulëta.

10 shkurt - Nënkryetari i Këshillit të Lartë të Drejtësisë, Kreshnik Spahiu jep dorëheqjen, pas hetimit parlamentar që po zhvillon një komision i posaçëm, i cili e akuzon për shkelje të ligjit dhe përfshirjes në veprimtari politike.

20 shkurt - Ndahet nga jeta kapiten shqiptar Feti Vogli, gjatë një misioni në Afganistan.

MARS

1 mars - Kuvendi miraton me konsensus ndryshimet në kodin Penal, duke mbyllur kapitullin e ligjeve me 3/5, si pjesë e reformave të kërkuara nga Brukseli.

5 mars - Zhvillohet në Tiranë takimi konsultativ mes Komisionit Europian dhe autoriteteve shqiptare për planin e veprimit për përmbushjen e 12 prioriteteve të përcaktuara nga Brukseli për integrimin e Shqipërisë në BE.

20 mars -Mbahet në Tiranë takimi i tretë i Komisionit të Stabilizim Asocimit, ku përfaqësues të BE-së u shprehën të kënaqur nga zhvillimet pozitive politike të muajve të fundit, të cilat bënë të mundur që vendi të shënojë përparim në rrugën e integrimit.

21 mars- Bashkimi Europian kërkon përshpejtimin dhe realizimin në kohë të reformës zgjedhore në Shqipëri. Drejtori i Përgjithshëm për Zgjerimin në Komisionin Europian, Stefano Sannino, i cili ndodhej në Tiranë, vlerësoi ndër të tjera se heqja e imuniteteve për deputetët dhe zyrtarët e lartë është një shtyllë e rëndësishme në luftën kundër korrupsionit.

PRILL

12 prill- Kuvendi miraton mes debatesh, me votim elektronik, kandidaturën e Elvis Cefës për postin e anëtarit të ri të Këshillit të Lartë të Drejtësisë.

24 prill - Kryeministri Berisha gjatë një vizite në Uashington, takon Sekretaren amerikane të Shtetit Hillary Clinton.

26 prill - Ish-kryesocialisti Fatos Nano, i vetëshpallur si kandidat për postin e Presidentit takon kryetarin e PS-së, Edi Rama.

30 prill - Kryetari i Partisë Socialiste, Edi Rama, i drejton një letër kryeministrit Sali Berisha dhe drejtuesve të partive të tjera parlamentare, ku i fton të nisin një dialog konstruktiv për procesin e zgjedhjes së presidentit të ri të vendit.

30 prill- Prezantohet partia e re e qendrës së djathtë, 'Fryma e Re Demokratike'.

MAJ

2 maj - Qeveria shqiptare miraton një ligj të posaçëm, që i njeh misionit EULEX në Kosovë autoritetin për të zhvilluar hetime edhe në Shqipëri, lidhur me akuzat e përfshira në raportin e relatorit të Këshillit të Europës, Dick Marty, për një trafik të mundshëm organesh të zhvilluar nga UÇK-ja në fund të viteve '90 edhe në territorin shqiptar.

3 maj- Komisioneri për Zgjerimin, Stefan Fyle, gjatë një vizite në Tiranë, deklaroi se Shqipëria ka pasur arritje të mëdha, por nevojiten më shumë përpjekje për të marrë statusin e vendit kandidat dhe për të përparuar drejt anëtarësimit në BE.

3 maj - Kuvendi miraton me konsensus pr/ligjin "Për gjykatën administrative", tre vjet pas depozitimit të tij në parlament, që përbën një nga zbatimet kryesore të reformave ligjore, në kuadër të 12 rekomandimeve të KE-së.

8 maj - Kryetari i PS-së, Edi Rama dhe kryetari i LSI-së, Ilir Meta takohen pas disa vitesh për të diskutuar rreth procesit të zgjedhjes së presidentit të ri të vendit.

9 maj - Partitë e vogla gjatë një tryeze të përbashkët i bënë apel dy partive të mëdha, PD dhe PS, që t'i përmbahen marrëveshjes së nënshkruar nga 26 partitë politike për amendimin e kodit zgjedhor.

10 maj - Ish-kryetari i PS-së, Fatos Nano takon kryeministrin Berisha, ku ky i fundit rithekson qëndrimin e tij të bërë publik se maxhoranca nuk do të mbështesë kandidaturën e z. Nano për postin e Kreut të Shtetit.

21 maj - Këshilli i Ministrave shpall datën 22 maj ditë zie, në nderim të kujtimit të viktimave të aksidentit tragjik të Himarës, ku humbën jetën 12 studente të universitetit të Elbasanit "Aleksandër Xhuvani".

23 maj - Shqipëria, gjatë një ceremonie në Strasburg, mori zyrtarisht presidencën e Këshillit të Europës, duke e kryesuar për gjashtë muaj këtë organizatë.

24 maj - Kuvendi i Shqipërisë zyrtarizon nisjen e procedurave për zgjedhjen e Kreut të ri të shtetit, dy muaj para mbarimit të mandatit të Presidentit

29 maj - Maxhoranca e djathtë propozon si kandidat të sajin për postin e presidentit të ri të Republikës anëtarin e Gjykatës Kushtetutese, Xhezair Zaganjori.

31 maj - Kuvendi konsumon, pa hyrë në votim, raundin e parë për zgjedhjen e presidentit të ri të Republikës. Në këtë seancë nuk u paraqit asnjë kandidaturë, pasi dy grupet e mëdha në parlament, PD e PS, nuk gjetën konsensus për kandidaturën e propozuar nga mazhoranca e djathtë, anëtarin e Gjykatës Kushtetuese, Xhezair Zaganjori.

ISHË TEKNIKE- ZHVILLIMET POLITIKE NË VITIN 2012 (II)

QERSHOR

3 qershor - Kryeministri Sali Berisha dhe kryetari i Partisë Socialiste, Edi Rama mbyllin pa rezultat një takim mes tyre në përpjekje për të arritjen e një procesi konsesual dhe transparent në zgjedhjen e Presidentit të ri të Republikës.

4 qershor - Kuvendi konsumon raundin e dytë të votimit për zgjedhjen e presidentit të ri të Republikës, ndërkohë që në konkurim nuk u paraqit asnjë kandidaturë dhe sipas ligjit, votimi u konsiderua i kryer.

10 qershor - Maxhoranca propozon Artan Hoxha si kandidat të saj për postin e Presidentit të ri të Republikës.

11 qershor - Artan Hoxha, kandidati i propozuar nga maxhoranca e djathtë për postin e Presidentit, tërhiqet nga gara, pak para votimit të tij në Kuvend.

11 -qershor- Partia Demokratike propozon emrin e Bujar Nishanit për postin e Presidentit, pas tërheqjes nga gara të analistit, Artan Hoxha.

11 qershor - Kuvendi i Shqipërisë miraton në raundin e katërt Bujar Nishanin në postin e Presidentit të ri të Republikës. Në votim kandidatura e Nishanit mori 73 vota, ndërsa opozita nuk mori pjesë në votim.

22 qershor - LSI, pjesë e koalicionit qeverisës, propozoi një seri ndryshimesh në tre ministritë e drejtuara prej saj.

24 qershor - Kryeministri i Kosovës Hashim Thaçi zhvillon një vizitë në Tiranë, me ftesë të kryeministrit Berisha.

28 qershor - Kuvendi miraton disa ndryshime në kabinetin qeveritar, të propozuara nga kryeministri Berisha. Me votat e maxhorancës Kuvendi miratoi emërimin e Flamur Noka në postin e ministrit të Brendshëm; të Vangjel Tavo, në postin e ministrit të Shëndetësisë; të Edmond Haxhinasto, në postin e ministrit të Ekonomisë si dhe të z. Edmond Panariti, në postin e ministrit të Jashtëm.

KORRIK

11 Korrik - PD dhe PS arritën marrëveshjen për reformën zgjedhore, duke rënë dakort dhe për çështjet e mbetura pezull, që deri tani kishin mbajtur të bllokuar mbylljen e saj.

24 korrik -Ceremonia e zhvilluar në Presidencë mbylli të gjitha veprimtaritë e organizuara me rastin e dorëzimit të detyrës së Presidentit nga Bamir Topi tek Bujar Nishani.

GUSHT

2-3 Gusht - Tiranën e vizitoi Zv/kryeministri dhe Ministri i Jashtëm i Izraelit, Avigdor Lieberman me rastin e ceremonisë së hapjes së ambasadës Izraelite në Tiranë.

SHTATOR

6 Shtator - Zv/ndihmëssekretari amerikan i Shtetit për Çështje të Europës dhe Euroazisë, Philip Reeker vizitoi Tiranën.
18 shtator -Kuvendi miratoi me 130 vota heqjen e imunitetit të deputetëve dhe zyrtarëve të lartë pas një seancë që zgjati disa orë.

27 shtator -Ministri i Jashtëm i Shqipërisë, Edmond Panariti, ai i Greqisë, Dimitris Avramopoulos dhe i Italisë, Giulio Terzi nënshkruan në Nju Jork, Memorandumin për Bashkëpunim në lidhje me Projektin TAP (Trans Adriatic Pipeline), ndërmjet Shqipërisë, Greqisë dhe Italisë.

TETOR

3 tetor -Ministri Panariti zhvilloi një vizitë në Athinë, ku u takua me homologun grek, Dimitris Avramopoulos dhe Presidentin e Greqisë, Karlos Papulias.

5 tetor -Asambleja Parlamentare e OSBE-së çeli në Tiranë sesionin e saj të vjeshtës, në prani të mbi 200 pjesëmarrësve nga 56 vende anëtare të kësaj organizate.
10 Tetor - Komisioneri për Zgjerimin në BE, Stefan Fyle, rekomandoi dhënien e statusit të vendit kandidatit në BE për Shqipërinë. Fyle deklaroi se Komisioni rekomandon që Këshilli duhet t’i ofrojë Shqipërisë statusin e vendit kandidat, në varësi të plotësimit të masave kyçe në fushat e reformave të gjyqësorit dhe administratës publike dhe rishikimit të rregullores së parlamentit.
11 Tetor - Kuvendi miratoi me 73 vota kandidaturën e Lefterie Lleshit për postin e kryetares së re të Komisionit Qendror të Zgjedhjeve.

NENTOR

1 Nëntor -Moment historik u konsiderua vizita në Tiranë e Sekretares amerikane të Shtetit, Hillari Clinton në kuadër dhe të kremtimeve të 100-vjetorit të pavarësisë së vendit. Clinton zhvilloi takime me kreërt më të lartë të vendit dhe mbajt i një fjalë në Kuvend ku rikonformoi edhe një herë mbështetjen e fortë të SHBA-së ndaj Shqipërisë.

23 nëntor -Kryeministri i Maqedonisë, Nikola Gruevski, zhvilloi një vizitë zyrtare në Shqipëri, me ftesë të Kryeministrit Berisha, në kuadër të 100 vjetorit të Pavarësisë.

28 nëntor -Ceremonitë e festimeve të 100-vjetorit të shpalljes së Pavarësisë së Shqipërisë nisën në qytetin e Vlorës për të vazhduar pastaj me një sërë aktivitetesh në Tiranë. Fillimisht u bë hapja zyrtare e ceremonisë së kremtimit të 100- vjetorit të Pavarësisë në Vlorë. Më pas u kryen homazhe në Monumentin e Pavarësisë dhe vendosje kurorash mbi varrin e Ismail Qemalit. Festimet vijuan në Tiranë me nderimin pranë monumentit “Nënë Shqipëri”, drekën zyrtare të ofruar nga Kryeministri Berisha dhe Ministri i Jashtëm Panariti, koncertin e madh me pjesëmarrjen e grupeve folklorike nga të gjitha trevat shqipfolëse, paradën e FA, përurimin e Monumentit të Pavaresisë. Koncerti Jubilar në Pallatin e Kongreseve dhe koncerti përmbyllës me pjesëmarrjen e këngëtares Rita Ora dhe artistë të tjere shqiptarë. Festimet u mbyllën me Darkën Zyrtare në Pallatin e Brigadave, ofruar nga Presidenti i Republikës Bujar Nishani.

29 nëntor -Kryeministri i Sllovenisë, Janez Jansa, zhvilloi një vizitë zyrtare në Tiranë.

DHJETOR

3 dhjetor - Presidenti i Republikës, Bujar Nishani, dekretoi hënën 23 qershorin 2013 si datën e zgjedhjeve të ardhshme për Kuvendin.

7 dhjetor -Kuvendi i Shqipërisë miratoi dekretin e Presidentit të Republikës për emërimin e Adriatik Llallës në postin e Prokurorit të Përgjithshëm të Shqipërisë. Dekreti i Presidentit mori 75 votat e maxhorancës, ndërsa opozita abstenoi.

7 dhjetor -Pas një seance të gjatë debati, që përfshiu deputetë të të gjitha grupeve parlamentare, Kuvendi miratoi në parim projektligjin "Për buxhetin e vitit 2013".

10 dhjetor -Kryetari i Aleancës për Ardhmërinë e Kosovës dhe ish-kryeministri i Kosovës, Ramush Haradinaj, zhvilloi një vizitë zyrtare njëditore në Republikën e Shqipërisë, me ftesë të Kryeministrit Berisha, ku takoi krerët më të lartë të shtetit shqiptar.

11 dhjetor -PD festoi 22 vjetorin e krijimit te saj në Pallatin e Kongreseve në Tiranë me një ceremoni festive.

11 dhjetor - Përfundimet e miratuara nga Këshilli i Ministrave të Jashtëm të BE-së vlerësojnë se dhënia e statusit të kandidatit do të kryhet sapo të jenë përmbushur tre reformat e përcaktuara në rekomandimet e KE-së, përfshirë dhe veprimet e mëtejshme nga ana e Shqipërisë për të luftuar korrupsionin dhe krimin e organizuar.

20 dhjetor - KKRRT miraton lejen infrastrukturore për kaskadën e Devollit dhe e përcakton TAP çështje të rëndësisë kombëtare, dy investimet më madhore energjike mbi 2.7 miliardë euro.

HermesNews - ©2013

Dërgo me email | Stampo artikullin