02/01/2013 10:47:39

Ekonomia gjate 2012-tes

Permbledhje e lajmeve kryesore

TIRANË - Privatizimi i sektorëve strategjikë vijoi këtë vit me kompaninë publike të nxjerrjes së naftës "Albpetrol", që ende nuk ka përfunduar, ndërsa para pak ditësh u zhvillua tenderi për privatizimin e 4 HEC-eve të mesëm Bistrica 1 dhe 2, Ulëz dhe Shkopet, rezultatet e të cilave pritet të dalin së shpejti. Njëkohësisht, gjatë këtij viti ka vijuar dhe privatizimi i aseteve shtetërore.

METE vjet përgatiti për privatizim 440 asete shtetërore me vlerë 5,6 miliardë lekë. Plani i qeverisë për këtë vit përfshin rreth 500 objekte për t'u privatizuar, kryesisht nga ministria e Mbrojtjes, Ekonomisë, Bujqësisë, Arsimit, etj.

Gjatë vitit 2012 të ardhurat nga procesi i privatizimeve janë 5-fishuar, duke tejkaluar parashikimin dhe nga 105 milionë lekë të parashikuar, vlera e të ardhurave në buxhet nga privatizimet e aseteve publike në 6 muajt e parë kapi vlerën 652 milionë lekë. Vjet në buxhetin e shtetit u mblodhën nga privatizimet e aseteve publike 438 milionë lekë, ose 46% më shumë se plani.

Gjatë vitit 2012 ministria e Ekonomisë zhvilloi aktivitete në hartimin e kuadrit ligjor për privatizimet dhe realizimin e tyre sipas afateve:

19 Janar- Ministri i METE-s, Nasip Naco tha se këtë vit do të privatizohen 100% e aksioneve shtetërore të kompanisë “Abpetrol”, të aksioneve të “Albtelekom” dhe paketa e aksioneve shtetërore të ARMO-s për pronarët e truallit dhe punonjësit.

20 Shkurt- Komisioni për Veprimtaritë Prodhuese, Tregtinë dhe Mjedisin në Kuvend diskutoi p/ligjin "Për disa shtesa dhe ndryshime në ligjin nr. 7746, datë 28.7.1993 "Për hidrokarburet (kërkimi dhe prodhimi)", që përfshin kompaninë publike "Albpetrol", në proces privatizimi këtë vit.

29 Shkurt- Komisioni për Veprimtaritë Prodhuese, Tregtinë dhe Mjedisin miratoi p/ligjin "Për disa shtesa dhe ndryshime në ligjin nr. 7746 datë 28.7.1993 "Për hidrokarburet (kërkimi dhe prodhimi)" vetëm me votat e mazhorancës.


11 Maj- Deri në datën 26 korrik do të pranohen ofertat nga blerës të mundshëm të kompanisë publike të naftës "Albpetrol", njoftoi Ministria e Ekonomisë, duke ftuar palët e interesuara të paraqesin ofertat e tyre.


2 Shtator- Ministria e Ekonomisë do të çelë në 7 Shtator tenderin ndërkombëtar për shitjen e aksioneve të kompanisë publike nxjerrëse të naftës, "Albpetrol", njoftuan burimet zyrtare të saj.

7 Shtator- Në tenderin ndërkombëtar për privatizimin e kompanisë publike të naftës, "Albpetrol" që u zhvillua në ministrinë e Ekonomisë, u paraqitën 6 kompani me oferta që variuan nga 52 milionë usd, në 850 milionë euro. Kompania "Silk Vetro Road Equity" Ltd dha ofertën më të lartë, 850 milion euro.

14 Shtator- Tenderi për privatizimin e katër HEC-eve: Bistrica 1 dhe 2, Ulëz dhe Shkopet, dështoi pasi asnjë nga 8 kompanitë, që kishin tërhequr dokumentat, nuk paraqiti ofertat në datat e caktuara nga METE, në 10 dhe 13 shtator, tha ne media zv/ministri i Ekonomisë, Sokol Dervishaj.

28 Shtator- Kompania amerikane "Vetro Energy" do të jetë pretendentja kryesore për blerjen e kompanisë publike të naftës "Albpetrol", pasi Komisioni i Vlerësimit të Ofertave në METE me konsulenten "Patton Bogs" vlerësoi ofertën me pikët më të larta si në ofertën financiare prej 850 milionë euro, edhe atë teknike. Zv/ministri i Ekonomisë, Sokol Dervishaj paraqiti sot vendimin teknik të Komisionit të Vlerësimit të ofertave për privatizimin e paketës së plotë shtetërore “Albpetrol”.


3 Tetor- Qeveria shpalli fitues të blerjes së paketës 100% të aksioneve të kompanisë së nxjerrjes së naftës "Albpetrol" kompaninë amerikane "Vetro Energy", e cila dha ofertën prej 850 milionë euro dhe do të shfrytëzojë naftën shqiptare për 25 vjet. Vendimi erdhi pasi Komisioni i Vlerësimit të Ofertave në ministrinë e Ekonomisë, në bashkëpunim me konsulentin "Patton Boggs" dorëzuan raportin përfundimtar në Këshillin e Ministrave, ku fitues rezulton "Vetro Energy", që mori pikët maksimale 97.79 pikë, 75 pikë për vlerësimin financiar (oferta 850 milionë euro) dhe vlerësimin teknik, 22.79 pikë.



4 Tetor- Qeveria vendosi disa ndryshime në procedurat për përzgjedhjen e investitorëve në sektorët me rëndësi të veçantë në tenderat gjatë proceseve të privatizimit. Në bazë të ndryshimeve, kandidatët për privatizime në këta sektorë nuk do t'a kenë më detyrim që të paraqesin shprehjen paraprake të interesit.


5 Tetor- "Vetro Energy" dha konferencën e parë për shtyp, ku prezantoi përbërjen me kompanitë "Silkroad Equity" me 49% aksione, "Ypo Holding" me 51% aksione dhe planin e zhvillimit në 5 vitet e ardhshme në fushën e naftës shqiptare. Roszak, president i "Vetro Energy", prezantoi pronarin e ARMO-s, Rezart Taçi, si president i kompanisë "YPO Holdings" dhe partner kryesor në konsorcium. Taçi bëri të ditur programin e investimit në Albpetrol të "Vetro Energy", që do të investojë 220 milionë euro në 5 vjet.


10 Dhjetor- Ministria e Ekonomisë nisi procedurat për të kërkuar 10% të vlerës së garancisë bankare 85 milionë euro, të depozituar nga grupi “Vetro Energy” në tenderin për blerjen e kompanisë publike të naftës “Albpetrol” në 7 shtator. "Vetro Energy" nuk finalizoi në afatin e duhur marrëveshjen e blerjes së aksioneve, datën 3 dhjetor dhe negociatat me të tejkaluan afatet ligjore, tha sot për mediat Zv/ministri i Ekonomisë dhe kryetar i Komisionit të Vlerësimit të ofertave për privatizimin e Albpetrol-it në ministrinë e Ekonomisë, Sokol Dervishi.

11 Dhjetor- Ministria e Ekonomisë do të zhvillojë në 21 Dhjetor tenderin e hapur për privatizimin e katër hidrocentraleve, Bistrica 1 e Bistrica 2 dhe Ulzë-Shkopet, thanë burime zyrtare të METE-s.

21 Dhjetor- Kompania turke "Kurum" ofroi çmimin më të lartë për blerjen e HEC-eve Bistrica 1 dhe Bistrica 2 në shumën 52 milionë euro në ministrinë e Ekonomisë, ku sot u hapën ofertat për privatizimin e shoqërive HEC Bistrica 1 dhe Bistrica 2 sh.a.

21 Dhjetor- Grupi "Kurum International" dha ofertën më të lartë financiare, 57,5 milionë euro për privatizimin e dy HEC-eve të mesëm, Ulëz dhe Shkopet, ndërsa një orë më parë ofroi shumën më të lartë për blerjen e HEC-eve: Bistrica 1 dhe Bistrica 2 prej 52 milionë euro.

HermesNews - ©2013

Dërgo me email | Stampo artikullin